“Tien qu’haber un sitiu pa los nuesos idiomes”, reclama García Arias

Xosé Lluis García Arias recibió esti 8 setiembre la medaya d’Asturies en reconocimientu pol so llabor pola cultura y llingua asturianes. “Tien qu’haber un sitio pa los nuesos idiomes, mesmamente pal eonaviego na estaxa onde se fala”, espresó’l filólogu dirixéndose al presidente Adrián Barbón nel Auditoriu d’Uviéu llueu de recoyer el diploma y el premiu.

Un merecíu homenaxe que compartió con Luis Fernández-Vega, Laura González, María Teresa Álvarez y José Andrés, anque’l concineru que fixo carrera n’Estaos Xuníos nun pudo desplazase a Asturies p’acudir a un eventu al que nun asistieron los diputaos de VOX na Xunta Xeneral y que contó cola presencia de los presidentes de les dos cámares de les Cortes españoles, la del Congresu, Francina Armengol, y el del Senáu, Pedro Rollán, asina como del ministru de Sanidá, José Manuel Miñones. Amás, Ángeles Flórez Peón ‘Maricuela’ y Antonio Suárez Gutiérrez, xunto col rector Leopoldo Alas Argüelles a títulu póstumu, foron declaraos fíes y fíos predileutos, y Juan Ramón Lucas, adoptivu.

Nun pudo ocultar la emoción García Arias nes so curtia intervención al recibir la medaya y el diploma. “Tien qu’haber un sitiu pa los nuesos idiomes, mesmamente pal eonaviego na estaxa onde se fala. Pero ello namái s’algama si los falantes ven nidiamente un tratu dignu y a la par igualitariu na necesaria llegalidá que tien que los sofitar”, concluyó les sos pallabres dirixéndose a Barbón.

Enantes fixera una alcordanza de la so mocedá, cuando inauguraron una biblioteca na so Teberga natal cuando tenía 5 años y nun-y dexaron acceder a los llibros por nun tener los 6 necesarios, y rellató que tampoco fora posible facer un diccionariu nel departamentu nel que trabayaba depués de doctorase en Filoloxía con una tesis sobre la fala del so conceyu y del que-y brindaren ser sodireuto del mesmu. “Pela mio cuenta entamé’l trabayu”, confesó, teniendo como resultáu, col sofitu de delles persones, el Diccionariu Etimolóxicu de la Llingua Asturiana, y siguió con una solicitú al presidente pa que nun se repitiera l’episodiu de la biblioteca y que’l diccionariu “s’afite col puxu de toos”.

Na semeya, García Arias y Barbón.