El Gobiernu reconoz el llabor de García Arias cola medaya d’Asturies

|
Xosé Lluis García Arias

El Conseyu de Gobiernu decidió esti vienres conceder cuatro de les cinco medayes d’Asturies por “cuatro trayeutories de prestixu” en dellos ámbitos. Xosé Lluis García Arias, primer presidente de l’Academia de la Llingua Asturiana (ALLA), ye ún de los reconocíos, honor que comparte con Luis Fernández-Vega, Laura González y María Teresa Álvarez.

Nacíu en Teberga nel 1945, García Arias ye una figura clave nel estudiu, normativización y difusión de la llingua asturiana. Presidente de l’ALLA dende la so creación hasta’l 2001 y doctor en Filoloxía Románica pola Universidá d’Uviéu, ye responsable d’un preséu fundamental pal nuesu idioma como’l ‘Diccionariu Etimolóxicu de la Llingua Asturiana (DELLA)’, que permite conocer la historia llingüística d’Asturies.

Espublizáu’l primer tomu nel 2018, completóse’l trabayu nel 2021 col asoleyamientu de cinco más y el séptimu, el ‘Diccionariu de la Llingua Asturiana. Apéndiz. Índices y Bibliografía’. Amás, García Arias foi cofundador de Conceyu Bable y primer cabezalerud’esti coleutivu clave nel procesu de recuperación llingüística, y tien fechos numberosos ensayos y estudios llingüísticos.

Les distinciones institucionales máximes del país, que van ser aprobaes formalmente nuna xunta posterior del Executivu, pendiente de la concesión d’una quinta, tamién van pa persones del ámbitu de la medicina, la política y la proyeición d’Asturies. Asina, l’oftalmólogu Fernández-Vega; la primer muyer en presidir la Xunta Xeneral, d’Izquierda Xunida, González; y la periodista y escritora candasina Álvarez, acompañen a García Arias nesti honor.

Hai que recordar que la Xunta Xeneral aprobó n’abril la unificación nuna única categoría de les dos tipos de de medayes esistentes hasta’l momentu, d’oru y de plata, al entender que los merecimientos pa entrambes han de ser de gran relevancia y consideración en tolos casos.

Fíos predileutos y adoptivu

Esta mañana tamién s’alcordó declarar fíes y fíos predileutos a otres trés personas que rescamplaren polos sos servicios en beneficiu d’Asturies y que gocie d’un reconocíu prestixu y la consideración xeneral de la sociedá. Son Ángeles Flórez Peón ‘Maricuela’, histórica militante socialista de más de 100 años d’edá; l’empresariu asturmexicanu Antonio Suárez Gutiérrez, cabeza visible del holding Grupo Marítimo Industrial (Grupo Mar); y, a títulu póstumu, el rector Leopoldo Alas Argüelles, fusiláu nel 1937 poles tropes franquistes n’Uviéu.

Amás, el popular periodista Juan Ramón Lucas, nacíu en Madrid nel 1958, de padre y madre asturianos, va recibir el títulu de fíu adoptivu, esto ye, figura que destacara polos sos servicios en beneficiu del país con independencia del so llugar de nacencia. L’Executivu considera que Lucas “foi ún de los radiofonistes con mayores audiencias de los años últimos” y que “dende’l so llabor profesional y la so proyeición social, ye ún de los meyores embaxadores d’Asturies poles sos continues referencies al Principáu nun mediu de gran difusión”.

Contador Estadistiques