Camblor cree que valorar como méritu l'asturianu nes oposiciones de RTPA “garantiza la so presencia na programación”

La RTPA asoleyó’l 30 d’avientu les bases d’una convocatoria d’emplegu pa cubrir dellos puestos nel ente públicu de comunicación. Nesta ocasión, per primer vegada, inclúise’l conocimientu de la llingua asturiana como méritu, lo que pa Rita Camblor, conseyera de Presidencia, “garantiza la presencia del asturianu na programación” de TPA y RPA.

Les oposiciones, que formen parte d’un procesu d’estabilización de plantiya, valoren sobre manera la esperiencia na RTPA. Nes sos bases inclúin el conocimientu del asturianu na estaya ‘B.3 Cursos de formación y titulaciones académiques’, pa lo que tienen en cuenta tanto los títulos C1 y B2 de certificación de Llingua Asturiana adaptaos al Marcu Común Européu de Referencia pa les Llingües, como los diplomes o certificaos de l’Academia de la Llingua Asturiana, Conseyería de Cultura o la Universidá d’Uviéu que tenga l’aspirante.

Según esplicó Camblor nel Plenu de la Xunta Xeneral, la puntación máxima nesta estaya nel concursu ye de 6 puntos y col conocimientu del asturianu pue llegase hasta 4, siendo “posible algamar el máximu de puntos del apartáu B3 ensin acreitar conocimientu dalgún sobre la llingua asturiana. Lo mesmo ocurre col concursu-oposición”. Sicasí, pa la conseyera paez ser suficiente hasta’l puntu d’asegurar qu’esta convocatoria “garantiza la presencia del asturianu na programación”.

La conseyera dio estes esplicaciones nel Parllamentu énte una entruga de VOX fecha pol diputáu nuevu de la formación, Javier Jové, que sustitúi al dimitíu Ignacio Blanco, sobre “cuál ye’l propósitu pol que la convocatoria espublizada nel BOPA el 30 d’avientu del pasáu añu pa la provisión de places de personal de la Radiotelevisión del Principáu de Asturias (RTPA) contempla valorar como méritu l’acreitación del conocimientu de la llingua” (sic). Na réplica, Camblor recordó que la incorporación de la llingua asturiana nes bases vien por pidimientu del comité d’empresa y señaló que dicir que l’asturianu sía daqué inventao, como apuntó Jové, “ye d’una inorancia máxima”.

Semeya obra d'Armando Álvarez.