Galán respuende con Ástura a la entruga '¿Persiguióse l'asturianu nel Franquismu?'

|
Conferencia d'Ástura Franquismu Inaciu Galán

El doctor n'Humanidaes pola Universidá d'Uviéu ye'l convidáu na conferencia mensual sobre cultura asturiana qu'entama l'asociación nel Atenéu Obreru de Xixón.

Inaciu Galán va facer un repás históricu a la situación de la llingua asturiana ente'l 1936, cuando entama la Guerra Civil, y el 1976, un añu depués de la muerte de Francisco Franco. La so conferencia lleva'l nome de '¿Persiguióse l'asturianu nel Franquismu?' y ta basada na so tesis 'La llingua asturiana nel Franquismu', defendida en xineru, reconocida con un sobresaliente cum laude y propuesta a Premiu Estraordinariu de Doctoráu.

Nella apaecen casos qu’ilustren la represión llingüística xeneralizada que se vivió nes escueles demientres el Franquismu; el papel del Instituto de Estudios Asturianos (IDEA); la situación de la lliteratura escrita n’asturianu, mesmo n’Asturies que nel exiliu; y una revisión del papel de l’asociación Amigos del Bable, fundada nel 1969 y pieza clave pa entender l’apaición nel 1974 del asturianismu modernu que supón Conceyu Bable. "Esti trabayu apurre interesantes novedaes pa la hestoria del idioma asturianu nun periodu que nun taba hasta agora estudiáu con fondura. Ente elles, la presencia del asturianu nes visites de Franco a Asturies, o la celebración d’una misa en llingua asturiana nel Palaciu del Pardo, en Madrid, con motivu de los cincuenta años del so matrimoniu cola asturiana Carmen Polo", apunten los organizadores de la conferencia.

"El ponente va apurrir nesta conferencia una imaxe global de la situación de la llingua asturiana nel periodu de la dictadura de Francisco Franco, faciendo un repás a la ideoloxía que’l franquismu construyó sobre la so idea d’España en rellación a les llingües del Estáu y l’aplicación qu’ello tuvo na llexislación creada pa la xestión y represión d’esta realidá multillingüe", añaden. La intervención de Galán va tener llugar mañana, a les 19.30 hores, nel llar del Atenéu Obreru de Xixón, asitiáu na segunda planta de la Escuela de Comerciu Antigua, con entrada llibre.

Contador Estadistiques