Tornen les conferencies d'Ástura en Xixón sobre cultura asturiana

Celébrense el tercer martes de cada mes nel Atenéu Obreru de Xixón. Xosé Alba ye'l primer convidáu d'esta etapa nueva depués del parón obligáu pola pandemia de COVID-19.

El 18 de febreru del 2020 celebróse la última conferencia de l'asociación Ástura, a cargu d'Inaciu Galán baxo'l títulu de '¿Persiguióse l'asturianu nel Franquismu?'. Un mes depués la situación sanitaria, que llevó al confinamientu, impidió esta cita mensual cola cultura asturiana nel edificiu de la reformada Escuela de Comercio que venía celebrándose con ésitu los años anteriores na sede nueva del Atenéu Obreru y, previamente, na vieya de la cai Cuadonga.

Agora, pasaos dos años y mediu, yá cola pandemia en situación de 'normalidá nueva', retómase esta actividá cola presencia d'Alba, profesor titular d'Economía Aplicada de la Universidá d'Uviéu y vicepresidente del Conseyu Asturianu del Movimientu Européu (CASME), entidá promotora n'Asturies de la Vía Carlomagno, que va falar de la 'Via Charlemagne: itinerariu cultural y turísticu européu'. "Ástura quier sofitar esta importante iniciativa cultural –de la qu'Asturies ye miembru– pola dimensión del proyeutu, los sos oxetivos culturales y les sos posibilidaes enormes de desendolcu", espliquen dende'l coleutivu.

Esta vía ye "una rede d'itinerarios que parten d'Aquisgrán, onde s'allugó la corte de Carlomagno, y se dirixen a puntos de toa Europa venceyaos col emperador. Cuando se consolidó la propuesta ne 2018, quedó integráu l'Asturorum Regnum, comprendiendo Asturies y el norte de Portugal", añaden. La conferencia va celebrase a les 19 hores d'esta tarde, con entrada llibre hasta completar aforu.