Éstes son les propuestes de l'Academia de la Llingua Asturiana a Urtasun sobre política llingüística estatal

La visita al llar social, primera d'un ministru de Cultura, y aconceyamientu cola Xunta de Gobiernu, "un finxu históricu" nes rellaciones interinstitucionales de l'ALLA.

Ernest Urtasun peslló la so axenda d'ayeri n'Asturies con un alcuentru na Academia de la Llingua Asturiana (ALLA) na que tuvo presente Ana Vanessa Gutiérrez. El presidente Xosé Antón González Riaño encargóse de recibir al voceru de Sumar y a la conseyera de Cultura, Política Llingüística y Deporte a pie de cai nuna xornada mui significativa: celebrábase'l Día Internacional de la Llingua Materna.

"Recoyendo l’apreciu que’l ministru amosó pa cola llingua asturiana y l’Academia, los miembros de la Xunta de Gobiernu treslladáron-y delles propuestes d’aición nel planu estatal" en política llingüística, apuntaron dende la institución. Foron les siguientes:

1. Reconocer la especialidá docente pal profesoráu de Primaria y Secundaria, per aciu del necesariu axuste nel decretu d’especialidaes docentes del Ministeriu d’Educación.
2. Reglamentar l’usu del asturianu nel Parllamentu español y amestalu a toles iniciatives llingüístiques que surdan nel so ámbitu.
3. Homologar económicamente a l’ALLA coles otres academies nos Presupuestos Xenerales del Estáu, vista la desproporción actual del casu asturianu.
4. Considerar l’asturianu nos proyeutos de desendolcu de programes d’intelixencia artificial y traductores neuronales que, nun momentu d’aceleración na so producción y usu, puen ufiertar oportunidaes de futuru a les llingües minoritaries.
5. Asegurar la presencia del asturianu nos programes de promoción llingüístico-cultural del Institutu Cervantes.
6. Considerar la lliteratura n’asturianu ente les candidatures a los premios nacionales de lliteratura.

Dende l'ALLA rescamplaron el "clima d'entendimientu llográu" col ministru, apautando contautos pa facer un siguimientu de les propuestes apurríes.

Na semeya, González Riaño intervién mientres Urtasun toma nota.