El ministru Ernest Urtasun ye claru, finalmente, sobre la oficialidá

Asina esplicó'l responsable de Cultura nel so segundu día de visita n'Asturies el so compromisu col asturianu.

Ernest Urtasun posicionóse finalmente a favor de la reconocencia de los derechos llingüísticos de los asturianos. “Dende’l Ministeriu de Cultura, y la conseyera sábelo, tamos comprometíos col asturianu nel camín hacia la oficialidá”, aseguró depués de la Conferencia Sectorial de Cultura celebrada nel avilesín Centru Niemeyer llueu de nun moyase la xornada anterior.

“Yo creo que sería positivo que l’asturianu pudiera ser oficial”, siguió'l voceru de Sumar, “pero’l fechu de que nun lo sía nun nos impide actuar. Dende llueu, les competencies que son direutamente míes, por exemplu estes ayudes a la creación lliteraria, que yá abrimos, pero tamién a la edición, que lo vamos ver próximamente, vamos apostar pol asturianu”.

Sintonía del Gobiernu d’Asturies con Cultura

Na mesma comparecencia énte la prensa, la conseyera de Cultura, Política Llingüística y Deporte, Ana Vanessa Gutiérrez, aseguró sentise “mui en sintonía” col programa estratéxicu del ministeriu. “Pivota muncho d’ello cola defensa de los derechos culturales y, cómo non, tamién, na defensa de los derechos llingüísticos de los asturianos”.