“En dalgunos ámbitos la política llingüística del Gobiernu del Estáu puede incidir n’Asturies”, apunta González Riaño

“Les otres llingües vense beneficiaes por actuaciones del Estáu y nós reclamamos tamién, como una llingua minoritaria que necesita muncha ayuda, les ayudes del Estáu”, espresa Xosé Antón González Riaño. El presidente de l’Academia de la Llingua Asturiana (ALLA) aconceyó con Rafael Cofiño, diputáu del partíu nel Executivu Sumar, “qu'entendió perfectamente los nuestros planteamientos” en diferentes cuestiones como la especialidá docente o’l PERTE de la Lengua.

Hebo bona sintonía ente González Riaño y Cofiño nel aconceyamientu celebráu’l vienres nel llar social de l’ALLA. “Sorprendióme’l control que tien sobre la situación asturiana, los análisis políticos que facía sobre les necesidaes d’Asturies dende’l puntu de vista llingüísticu y cultural, la implicación personal”, declaraba depués del alcuentru’l presidente de la institución.

“Dende l’Academia lo que-y treslladamos foi la idea de que, efeutivamente, la política llingüística n’Asturies tien que facese dende Asturies, pero hai dalgunos ámbitos nos que la política llingüística que decida’l Gobiernu del Estáu pue incidir n’Asturies, y nesi sentíu señalamos una serie de puntos que’l diputáu acoyó con un especial interés y implicación, de decisiones de política a nivel del Estáu que podía incidir en cuestiones de política llingüística n’Asturies”, esplicó.

El primer puntu a tratar foi la negociación col Ministeriu d’Educación del reconocimientu de la especialidá docente pal profesoráu de Primaria y Secundaria, “qu’esixe una modificación de los decretos d’especialidaes, planteamientu qu’entendió perfectamente”. Siguió cola posibilidá de desendolcar un “reglamentu específicu pal usu de la llingua asturiana nel Parllamentu español que nun xenerara una posición de desaire como ye la que representa nestos momentos l’autotraducción”.

Nesi sen recuerda que, magar la falta d’oficialidá, “l’asturianu sí ye una llingua reconocida xuridicamente como tal y dende esi puntu de vista dende nel Parllamentu merez una dignidá y esa dignidá pasa por un reglamentu que nun desconsidere al asturianu dende’l puntu de vista comunicativu, ye dicir, l’autotraducción pa una llingua minoritaria como l’asturianu ye una posición inadmisible. Hai que plantegar otru reglamentu”, lo que Cofiño, que confirmó la so voluntá de siguir emplegando l’idioma nel Congresu, tamién “apoyó con interés”.

Intelixencia artificial

Una cuestión mui importante ye “la posibilidá de que l’asturianu participe como llingua en tolos programes rellacionaos cola intelixencia artificial y colos traductores automáticos neuronales, etc. Nesti momentu hai una llinia presupuestaria potentísima del Gobiernu d’España nesi sentíu –el PERTE de la Lengua– pa col castellán y pa coles otres llingües oficiales. L’asturianu tien que tener ehí una presencia y beneficiase de los avances presupuestarios, organizativos y loxísticos en tolo rellacionao cola intelixencia artficial y los traductores”, espresó González Riaño.

Una mayor visualización y dignificación de “les actividaes que pudiera llevar alantre dende’l puntu de vista formativu, de divulgación, esplicación, etc., l’Instituto Cervantes tanto dientro como fuera d’España”, al contar nesti momentu esti organismu un programa pa les distintes llingúes oficiales nel que “l’asturianu tien que tar ehí nuna posición tamién digna”, y la posibilidá de participar “n’igualdá de condiciones con otres llingües no que son los Premios Nacionales de Lliteratura”, amás nun momentu “de desarrollu lliterariu que permite participar dignamente nesos premios”, son otros puntos que se trataron nesti alcuentru.

“Rafael Cofiño entendió perfectamente los planteamientos, implicóse nellos y va facer un siguimientu de les sos posibilidaes d’aplicación. Yo veo una posición mui intelixente, interesada y implicada”, esplicó’l caderalgu, qu’alcordó nuevos aconceyamientu nel futuru col diputáu de Sumar, qu'en redes sociales espresaba depués de la xunta que ye "un grandísimu placer visitar esta mañana l'Academia de la Llingua Asturiana y poder falar sobre midíes de política llingüistica a nivel d'Estáu con su presidente Xosé Antón G. Riaño. La llingua asturiana ye una prioridá pa la construcción de la identidá y el futuru d'Asturies".

“Lo que nun podemos facer ye treslladar la responsabilidá al Gobiernu central de lo que nun facemos equí. Equí lo que tenemos que llograr ye’l consensu al rodiu la oficialidá pa salvar l’idioma y poner en práutica’l procesu de recuperación equí n’Asturies, pero dende llueu a nivel del Estáu sí se pue ayudar y la prueba ye que les otres llingües vense beneficiaes por actuaciones del Estáu. Nós reclamamos tamién, como una llingua minoritaria, minorizada, que necesita muncha ayuda, les ayudes del Estáu”, concluyó’l presidente de la institución.

Otros alcuentros

Esta cita llegó poques hores depués d’un alcuentru cola viceconseyera de Cultura, Política Llingüística y Deporte, futura conseyera de Derechos Sociales, Cultura, Política Llingüística y Deporte, na sede alministrativa na que tamién tuvo presente Antón García, direutor xeneral d’Aición Cultural y Normalización Llingüística, pa tratar distintos asuntos. Enantes solicitaran un alcuentu cola ALLA formaciones polítiques como Convocatoria por Asturies y el PP que, al igual que’l restu de partíos, recibieron un documentu esquemáticu que fixa la idea de la institución sobre cómo podría ser el Plan de Normalización Llingüística qu’anunciara’l Gobiernu.

Mentes, la institución treslladó un pidimientu a Foro pa concretar una xunta col diputáu Adrián Pumares col oxetivu de “dir sentando les bases del máximu consensu posible al rodiu la cuestión llingüística”.

Na semeya, Cofiño y González Riaño nel llar social de l'ALLA.