Esmolición social polos proyeutos de grandes parques eólicos

|
Parque eólicu de Capieḷḷamartín dende Bustu

La campaña pa recaudar fondos pal entamu d'aiciones xurídiques en defensa del Cordal ye un ésitu. Algamó un 122 por cientu del oxetivu.

"La respuesta foi brutal y señala pa una direición: hai una esmolición social mui importante", espresó Ernesto Díaz, coordinador de la Plataforma para la Defensa de la Cordillera Cantábrica, al final de la campaña. Esti coleutivu asturianu ye una de les seis organizaciones que ta detrás d'esta iniciativa que tien l'únicu oxetivu de "defender esti santuariu natural de los abusos de les grandes corporaciones enerxétiques", apunten dende'l Fondu pa la Defensa Xurídica del Cordal.

L'oxetivu yera recaudar 40.500 euros, cantidá que se superó en 8.934 pa poner el total recaudáu en 49.434 euros. Foron 834 donaciones, de les que 49 corresponden a entidaes, ente elles empreses de turismu o agroalimentaries.

Dende'l Fondu rescamplen "l'alta amotivación y esmolecimientu nos territorios de Galicia, Asturies, Cantabria, Zamora, Lleón, Palencia, Burgos, Euskadi, Navarra y La Rioja" énte la gran cantidá de grandes parques eólicos en proyeutu en zones d'altu interés medioambiental y celebren la repercusion de la campaña y l'ésitu na tresmisión del mensaxe que llancen estos coleutivos. "Confirmamos el nuesu compromisu coles enerxíes renovables –principalmente a pequeña escala basaes nel autoconsumu o na proximidá de los grandes polos d'usu enerxéticu–, pero denunciamos la falta de planificación territorial y la nula sensibilidá medioambiental de munchos de los proyeutos en tramitación nel norte d'España, n'entornos d'enorme interés natural y paisaxísticu", espresen.

Amás de la Plataforma para la Defensa de la Cordillera Cantábrica, participen nesta iniciativa l’Asociación para a Defensa Ecolóxica de Galiza, la Sociedade Galega de Ornitoloxía, la Plataforma Bierzo Aire Limpio, la Plataforma para la Defensa de los Valles Pasiegos y la Mesa Eólica Merindades de Burgos.

Na semeya, parque eólicu de Capieḷḷamartín vistu dende Bustu.

 

Contador Estadistiques