Coleutivos ecoloxistes recauden fondos pa la defensa xurídica del Cordal énte macroparques eólicos

|
Parque eólicu de Capieḷḷamartín

L'asturiana Plataforma para la Defensa de la Cordillera Cantábrica, xunto con otros cinco coleutivos ecoloxistes, tien en marcha una campaña na rede pa recaudar fondos pa entamar iniciatives xurídiques contra macroproyeutos eólicos nel Cordal. Esisten anguaño 380 parques en tramitación y 433 en funcionamientu.

N’Asturies hai n’activo agora 22, con más del doble, mediu centenar, de solicitúes esistentes pa nuevos aeroxeneradores. Una presencia que’l Gobiernu pretende impulsar con una revisión de les Directrices Sectoriales d'Ordenación del Territoriu sobre Enerxía Eólica, del 2008, que, como anunciaba a Asturies.com Ernesto Díaz, coordinador de la Plataforma para la Defensa de la Cordillera Cantábrica, crea esmolecimientu poles consecuencies que podría tener pal mediu natural y la biodiversidá, pudiendo obligar a aiciones xudiciales pa frenar despropósitos como’l de Capieḷḷamartín.

Esti peligru, non esclusivu d’Asturies, llevó a seis organizaciones a axuntase pa crear “un frente xurídicu de conservación del Cordal Cantábricu”. Xunto cola plataforma con sede en Llugones participen l’Asociación para a Defensa Ecolóxica de Galiza, la Sociedade Galega de Ornitoloxía, la Plataforma Bierzo Aire Limpio, la Plataforma para la Defensa de los Valles Pasiegos y la Mesa Eólica Merindades de Burgos, coleutivos que conformaron un equipu de xuristes compuestu por María Ángeles López Lax, Olga Álvarez García, Víctor Álvarez Bayón, Antonio Ruiz Salgado, María Luz Ruiz Sinde y Fernando Adolfo de Abel Vilela, toos con esperiencia en derechu ambiental y urbanísticu y la mayoría miembros de la Rede d’Abogaes y Abogaos pa la Defensa Ambiental (RADA).

La pretensión del Fondu pa la Defensa Xurídica del Cordal Cantábricu ye recoyer, atender y sofitar les sensibilidaes de las numberoses iniciativas llocales que surdieron nos caberos meses, “dende los montes gallegos orientales al norte burgalés; dende l’occidente asturianu a los valles pasiegos; dende El Bierzo hasta los montes lleoneses y palentinos”. Asina, destináranse los esfuerciu xurídicos “n’analizar los defeutos en proyeutos y nes normes sobre les que deben pivotar los mesmos, y na falta de zonificaciones vinculantes que contemplen la esclusión de grandes proyeutos de les zones con alto grau de biodiversidá, xeodiversidá y valor paisaxísticu”.

L’oxetivu de la campaña ye recaudar 40.500 euros, de los que yá s’algamó un 60 por cientu cuando falten 17 díes pal fin de la mesma. En total hebo hasta’l momentu 539 donativos que sumen 24.236 euros.

Na semeya, el parque eólicu de Capieḷḷamartín mientres la so construcción (Valdés).

Contador Estadistiques