El Fondu pa la Defensa Xurídica del Cordal presenta la so primer demanda de calter estatal

|
Aeroxeneradores nel entornu del Cordal

La Plataforma para la Defensa de la Cordillera Cantábrica ta acabante de presentar, en nome de les seis entidaes promotores del Fondu pa la Defensa Xurídica del Cordal, la primer demanda de calter estatal a cargu del mesmu. Trátase d’un recursu énte’l Tribunal Supremu contra’l Plan Nacional Integrado de Energía y Clima 2021-2030 (PNIEC) y la zonificación ambiental.

El día 9, llueu d’anunciar el recursu nel setiembre pasáu, diose’l pasu depués que’l tribunal requiriese hasta per tres vegaes al Gobiernu estatal l’aportación completa del espediente. L’oxetu de la demanda que se presenta ye l’alcuerdu del Conseyu de Ministres y Ministros del 16 de marzu del 2021 pol que s’adoptó la versión final del PNIEC y la resolución de la Direición Xeneral de Calidá y Evaluación Ambiental pola que se formuló la declaración ambiental estratéxica del Plan y la ‘Zonificación ambiental pa enerxíes renovables: eólica y fotovoltaica’.

“La nulidá de dichos actos y disposición reglamentaria básase n’esencia en distintos motivos, según s’argumenta na demanda”, apunten dende’l Fondu. L’equipu xurídicu que se fai cargu d’esti procesu ta formáu poles abogaes ambientalistes María Ángeles López Lax, Olga Álvarez y María Luz Ruiz Sinde, integrantes del grupu de xuristes qu’asesoren a esta iniciativa promovida pola asturiana Plataforma para la Defensa de la Cordillera Cantábrica, l’Asociación para a Defensa Ecolóxica de Galiza (ADEGA), la Sociedade Galega de Ornitoloxía, la Plataforma Bierzo Aire Limpio, la Plataforma para la Defensa de los Valles Pasiegos y la Mesa Eólica Merindades de Burgos.

“L’oxetivu últimu de la demanda debería conllevar al Ministeriu pa la Transición Ecolóxica y el Retu Demográfiu a reconsiderar la so pasividá énte’l deterioru de la biodiversidá deriváu de la implantación masiva de grandes instalaciones de renovables y a l’adopción de midíes afayadices d’ordenación vinculante pa la penetración de les enerxíes renovables, conforme a los principios de prevención, precaución, correición na fonte y usu racional de los recursos naturales”, resumen. El Fondu pa la Defensa Xuridica del Cordal conformóse l'añu pasáu pa recaudar fondos pal entamu d'aiciones xurídiques, algamando nuna campaña de reacudación de fondos na rede 49.434 euros, 8.934 más de los marcaos nun primer momentu, confirmando asina la esmolición social énte "los abusos de les grandes corporaciones enerxétiques".

Na semeya, parque eólicu nel entornu del cordal.

Contador Estadistiques