El XLIV Día de les Lletres Asturianes yá tien cartelu

Va celebrase'l 5 de mayu col actu central, que recupera la entrada llibre y l'horariu vespertín, de vuelta nel uvieín Teatru Campoamor.

L'Academia de la Llingua Asturiana (ALLA) ta acabante d'asoleyar el cartelu del XLIV Día de les Lletres Asturianes. Entama asina la cuenta atrás pa la gran fiesta de les nueses lletres, na que Lourdes Álvarez va recibir el III Premiu Nacional de Lliteratura Asturiana.

La Xunta Estraordinaria de la institución pol Día de les Lletres Asturianes/Día das Lletras Asturianas va entamar a les 19 hores del vienres 5 de mayu nel Campoamor, depués de que la cita del añu pasáu tuviera llugar nel Filarmónica. La entrada, a diferencia de les ediciones anteriores pola situación sanitaria pola pandemia de COVID-19, va ser llibre pa toles ciudadanes y ciudadanos.

Na semeya, un momentu del actu pol Día de les Lletres Asturianes del 2022, celebráu nel Filarmónica.