L’ALLA recupera l’horariu vespertín y el Campoamor pal actu pol XLIV Día de les Lletres Asturianes

El vienres 5 de mayu va celebrase'l XLIV Día de les Lletres Asturianes, que recupera la normalidá depués de trés años marcaos pola pandemia de COVID-19. L’Academia de la Llingua Asturiana (ALLA) ta acabante de fixar esta fecha pa la celebración y confirma que l’actu institucional, que recupera l'horariu vespertín, torna al uvieín Teatru Campoamor.

La Xunta Ordinaria de la institución académica acordó na sesión celebrada ayeri estes cuestiones, cola previsión de zarrar la programación de la xornada nos meses próximos pa dalos a conocer n’abril. Una vuelta a la normalidá esperada depués de tener que modificar l’horariu, pasando l’actu a la mañana, y llevalu al Edificiu Históricu de la Universidá d’Uviéu, nel 2020, cuando tuvo que retrasase a ochobre, y al Teatru Filarmónica, nel 2022.

El Campoamor, que yá fora sede de la Xunta Estraordinaria pol Día de les Lletres Asturianes nel 2021, torna a acoyer la celebración, que tamién vuelve al horariu de tarde. Sicasí, va haber un adelantu sobre l’horariu tradicional, les 20.30 hores, “motivada por razones informatives y organizatives”, con entamu agora a les 19 hores.

Web nueva

L'ALLA ta acabante d'estrenar web baxo'l dominiu alladixital.org, con conteníos nuevos y una imaxe más moderna, anque caltién l'anterior academiadelallingua.com. Tamién remocicó'l diccionariu en llinia, que presenta mayores posibilidaes de busca.

Na semeya, el patiu de butaques del Campoamor nel XLII Día de les Lletres Asturianes, l'últimu que se celebró nel teatru uvieín, na que l'ALLA desendolcó l'actu con límite d'aforu y distancia de seguranza ente los asistentes, que namái pudieron acudir con invitación.