Xulio Vixil gana’l so primer Premiu Xosefa Xovellanos con ‘Miel amargo’

El más veteranu de los Premios Lliterarios, el Xosefa Xovellanos de novela, ye pa Xulio Vixil pol so trabayu ‘Miel amargo’. L’escritor yerbatu regálanos asina una obra en prosa cuasi venti años de la espublización de la destacada ‘L’inmoral’, asoleyada por Ediciones Trabe nel 2005.

‘Miel amargo’ ye una novela “áxil, d’entretenimientu, que combina humor, amor y intriga y qu’esplora les posibilidaes qu’ufierta l’universu paralelu, basáu nes teoríes científiques sobre’l tema, por casu, la teoría de les cuerdes”, rescampla’l xuráu de la cuarentena cuarta edición d’esti gallardón, con un recompensa de 6.000 euros y la espublización de la obra. Ésti tuvo compuestu pola llibrera Natalia González Menéndez; la profesora d’Educación Secundaria y Bachilleratu, Liliana Díaz Gómez; y l’escritor Gonzalo González Barreñada, ganador de la edición pasada por 'El viaxe del cacique', baxo la presidencia de Juncal Mónica García Velasco, xefa de serviciu de Planificación Llingüística, por delegación d’Antón García, direutor xeneral d’Aición Cultural y Normalización Llingüística, y con Lourdes Álvarez, filóloga adscrita a la Viceconseyería de Cultura, Política Llingüística y Deporte, como secretaria.

Nacíu en Santuyano nel 1964, Vixil ye llicenciáu en Filoloxía Hispánica pola Universidá d’Uviéu y profesor de Llingua Asturiana y Lliteratura. Diose a conocer cola obra ‘A la gueta l’alba’, premiada nel Concursu de Poesía de l’Academia de la Llingua Asturiana (ALLA) del añu 1986, y nel 1992 llevó’l Concursu de Creación Lliteraria Llorienzu Novo Mier, tamién de l’ALLA, cola so reconocida novela curtia ‘El paraísu blancu’.

En narrativa escribió tamién el llibru de rellatos ‘Silvia la negra’ (1993) y ‘L’inmoral’ (2005), última novela espublizada, mui valorada polos llectores. Miembru habitual del xuráu del Concursu de Cuentos pola Oficialidá del Asturianu qu’entama’l so conceyu, el so últimu trabayu asoleyáu foi la torna de la obra del francés Raymond Radiguet ‘Le diable au corps’ (1923), llevada nel 2009 al asturianu como ‘El diablu en cuerpu’ (Ediciones Trabe).

Cuartu ganador en conocese

Col fallu del Xosefa Xovellanos, yá se conocen los ganadores de cuatro de los ocho Premios Lliterarios convocaos esti añu pola viceconseyería de Cultura, Política Llingüística y Deporte. Fallárense enantes el XV Premiu Alfonso Iglesias de cómic, que foi pa Xon de la Campa por ‘Misteriu nel soterrañu’; el XIX Premiu Xuan María Acebal de poesía, pa Xosé Anxelu Gutiérrez Morán por ‘Les hores de lluz’; y el XXIX Premiu Máximo Fuertes Acevedo d’ensayu, pa Héctor Braga por ‘Nel cantu la memoria. Ensayu sobro l’asturianada tradicional’.