El vecín d'Illas al que-y refugaron un escritu por tar n'asturianu pide al alcalde que comunique que sí se pueden entregar

Reclama nel recursu presentáu al Conceyu la so dimisión y una disculpa pública al arquiteutu que respondió con un "deberá solicitar al interesado que presente su escrito en castellano".

Xuan Nel Gonzali, el vecín de La Peral que vio refugada una alegación por tar en llingua asturiana, rexistró nel Ayuntamientu d'Illas el llunes un escritu "contra la discriminación, illegalidá ya presunta prevaricación del alcalde d'Izquierda Xunida ya l'arquiteutu de la OUT de Pravia". Trátase de un "recursu/rempuesta" nel plazu correutu nel que, tamién n'asturianu, espón dellos puntos.

Nos primeros céntrase en recordar artículos del Estatutu Básicu del Emplegáu Públicu y la Llei de Procedimientu Alministrativo Común de les Alministraciones Públiques y en señalar que tanto l'alcalde Fernando Alberto Tirador Martínez como l'arquiteutu José Ignacio Fernández Arias "escaecen" la Llei d'Usu y Promoción del Asturianu, pa depués facer referencia a la Constitución. "Queda nidio que la llexislación ampara a los ciudadanos d'Asturies a la hora de presentar documentación n'asturianu al Conceyu d'Illas, ya pa cola Alministración asturiana; ya de nengún mou, naide tien qu'abandonar l'idioma de so pa presentar un documentu", espresa Gonzali.

Por último, "ya arriendes d'ello", pide que se declare "de nulu derechu l'escritu que m'unvía l'Ayuntamientu d'Illas, robláu pol alcalde y entamáu pol arquiteutu de la OUT de Pravia", reclamando al primeru "una comunicación/intervención pública" cola que "dexar bien nidio que sí se pueden facer/presentar escritos n'asturianu dirixíos al Ayuntamientu", y al segundu "una disculpa/comunicáu públicu" por "esta illegalidá ya discriminación pública". Tamién "una investigación pa esclariar si hebo delitu de prevaricación" y la dimisión del primer edil.

Nuna nota al final, indica d'igual forma que "esto nun quita de mio qu'emprime xestiones énte la xusticia ordinaria polos presuntos delitos cometíos por dos funcionarios públicos".