Discriminación llingüística n’Illas: l’alcalde demanda l’usu del “idioma oficial” pa tramitar un recursu

Un vecín de La Peral que yá tuviera problemes l’añu pasáu al presentar un escritu n’asturianu vese otra vuelta discrimináu por usar el so idioma pa dirixise a l’Alministración. Nesta ocasión ye l’alcalde Fernando Alberto Tirador el que nun almite a trámite un documentu por tar nesta llingua.

“Atendiendo a que l’asturianu nun ye idioma cooficial d’esta autonomía, y que l’artículu 4 de la Llei/1998, de 23 de marzu, d’Usu Y Promoción del Bable/Asturiano sólo resulta d’aplicación al Principáu d’Asturies, comunicase-y que vusté ha interponer el recursu nel idioma oficial a la fin de que se pueda proceder a la so tramitación”, respondió’l primer edil, de Convocatoria por Illas, nuna carta a Xuan Nel Gonzali. Esti ciudadanu pretendía presentar un recursu de reposición contra una resolución d’Alcaldía de finalización d’espediente de declaración responsable pa sustituyir una puerta y una ventana de la so vivienda.

Dase’l casu de qu’esti mesmu vecín sufriera la primavera pasada una respuesta asemeyada del Conceyu, nesa ocasión a partir d’un requerimientu de José Ignacio Fernández Aria, arquiteutu de la Oficina Urbanística Territorial de Pravia. Gonzali pidiera entós per escritu que se declare “de nulu derechu l'escritu que m'unvía l'Ayuntamientu d'Illas, robláu pol alcalde y entamáu pol arquiteutu de la OUT de Pravia”, reclamando al primeru “una comunicación/intervención pública” cola que “dexar bien nidio que sí se pueden facer/presentar escritos n'asturianu dirixíos al Ayuntamientu”, y al segundu “una disculpa/comunicáu públicu” por “esta illegalidá ya discriminación pública”.

“Queda nidio que la llexislación ampara a los ciudadanos d'Asturies a la hora de presentar documentación n'asturianu al Conceyu d'Illas, ya pa cola Alministración asturiana; ya de nengún mou, naide tien qu'abandonar l'idioma de so pa presentar un documentu”, espresara Gonzali, que tamién solicitara “una investigación pa esclariar si hebo delitu de prevaricación” y la dimisión del alcalde.