“Hai que ser valientes y avanzar nel desendolcu de la Llei d’Usu”, considera Pumares

“Pa eso nun faen falta 27 diputaos, sinón que faen falta 23” apuntó Adrián Pumares al falar de los retos d'Asturies pa los cuatro años próximos. El secretariu xeneral de Foro y únicu diputáu del partíu tamién rescampló que “hai una cuestión qu’hai qu’abordar nesta llexislatura, que ye la rede de cercaníes”, y cree necesario negociar col Gobiernu estatal el trespasu de les competencies ferroviaries.

Pumares arrancó la so intervención na rueda de prensa convocada pa esta mañana nel Parllamentu, na que’l pautu de Foro con VOX y la so situación dientro del partíu foron tema central, analizando que “la llexislatura pasada foi una llexislatura perdida onde hebo poca tramitación de lleis; onde hebo munchísimes lleis que quedaron pendientes, como la Llei de Puertos, la Llei LGTBI y la Llei de Retu Demográficu… Una pereza llexislativa por parte del Gobiernu de Barbón que ye esmolecedora”.

Demandó al Gobiernu próximu que, “evidentemente, va tar lideráu por Adrián Barbón”, que sía “munchu más ambiciosu y valiente a la hora de dos cuestiones: afrontar los grandes retos d’Asturies y esixir al Gobiernu d’España que cumpla colos sos compromisos con Asturies”. Al repeuto señaló que “venimos de cinco años de Gobiernu de Sánchez con munchos incumplimientos y creo sinceramente que necesitamos un Gobiernu y tamién una Xunta Xeneral que sía valiente a la hora de reclamar al Gobiernu d'España, independientemente del signu que tenga ésti a partir del 23 de xunetu, que cumpla col Principáu d’Asturies. Tenemos que dexar de ser una comunidá autónoma discriminada; nun queremos que ser más que nenguna comunidá autónoma pero tampoco vamos tolerar ser menos que les demás”.

Foi nesti puntu cuando apuntó que “hai una cuestión qu’hai qu’abordar nesta llexislatura, que ye la rede de cercaníes”. Pumares nun espera “del Gobiernu d’España, sía del Partido Popular o del Partido Socialista, que nos solucione los graves problemes que tenemos na nuesa rede de cercaníes nin nos dote d’una infraestructura ferroviaria que de verdá atienda les necesidaes del Principáu d’Asturies” y marca como “la única solución, la única alternativa que tenemos los asturianos”, el “aprovechar o cumplir l’Estatutu d’Autonomía y entamar coles negociaciones pa la tresferencia de competencies en materia ferroviaria”.

Reforma del Estatutu d'Autonomía

Al falar de la norma reflexonó que “nun sé si se va falar nestes primeres selmanes de la posibilidá reforma del Estatutu d’Autonomía, pero creo tamién qu’hai qu’abordar una reforma del Estatutu d’Autonomía que nos asitie al nivel d’otres comunidaes autonómes. Por diferentes motivos la pasada llexislatura nun foi posible; esta vez hai una aritmética parllamentaria entá más complicada, pero creo qu’en dalgún puntu del Estatutu d’Autonomía, como pue ser la convocatoria eleutoral, falar del preámbulu o analizar les competencies que debe asumir el Principáu d’Asturies, sí se pueden dar los númberos pa que salga alantre”.

No que respeuta a la política llingüística, rescampló que “independientemente se dean o nun se dean les condiciones pa esa reforma del Estatutu d’Autonomía, hai que ser valientes y avanzar nel desendolcu de la Llei d’Usu, qu’evidentemente nun se ta cumpliendo, y pa eso nun faen falta 27 diputaos, sinón que faen falta 23. Y creo sinceramente qu’hai 23 diputaos na Xunta Xeneral dispuestos a avanzar nesta materia”.

Más alantre, respondiendo a una entruga sobre coses concretes nes que se puede avanzar nesta materia, dixo “empezar por garantizar el cumplimientu. Recientemente víamos como’l Gobiernu d’Asturies nunes alegaciones n’asturianu d’una cuestión urbanística n’Illas, obligaba al ciudadanu a facelo en castellanu. Nesi sentíu la Llei d’Usu ye clara y tien que garantizar el cumplimientu de que cualquier persona que quiera dirixise a l’Alministración n’asturianu pueda facelo”.

Astención na investidura

Pa finar la so intervención, a la que depués siguieron les sos valoraciones al pautu cola ultraderecha del so partíu en Xixón, apuntó que’l votu de Foro “va dir nesa llinia de collaborar a facer frente a los grandes retos del Principáu d’Asturies, cola mayor de les llealtaes, y con tola esixencia. Tendemos la mano a Adrián Barbón tanto pal funcionamientu correutu de la Xunta Xeneral como pa ponese a trabayar a lo primero posible”.

Sobre la so posición nel Plenu d’Investidura, negó cualquier llamada del popular Diego Canga, que va presentar candidatura, solicitando’l so apoyu y apuntó que “en Foro Asturias nun tenemos previsto apoyar al candidatu del Partido Popular”. Sobre Barbón, esplicó que “ye dalgo que van analizar tamién los órganos del partíu”, anque adelantó que “la opción más probable ye qu’haya una astención.

Y no que respeuta al grupu mestu, que va compartir cola diputada de Podemos, Cova Tomé, apuntó que “nun tengo la menor dulda de que nun va haber nengún problema nel so funcionamientu”.