Selmana de les Lletres Asturianes

El Tribunal Constitucional sentencia a favor del usu del asturianu na Xunta Xeneral

|
Tribunal Constitucional

El recursu d’inconstitucionalidá presentáu por VOX sobre la reforma del Reglamentu de la Xunta Xeneral pa permitir l’usu del asturianu na Xunta Xeneral nun salió alantre. El Tribunal Constitucional, que va facer pública la so sentencia la selmana qu’entra, ve llegal dafechu la normativa aprobada l'añu pasáu.

Una información del diariu madrilanu ‘El Mundo’ avanza la decisión del Plenu, que dexa ensin argumentos a la formación ultraderechista nos sos ataques contra l’usu del asturianu nel Parllamentu asturianu. L’alderique foi intensu, pero la proteición que tien l’idioma nel Estatutu y la Llei d’Usu y Promoción del Bable/Asturianu, asina como l’usu normal na Cámara hasta la fecha, desniveló la balanza.

Iniciativa pol Asturianu celebró la noticia y defende “la necesidá de siguir trabayando na normalización social del asturianu, dando pasos pa llograr de manera definitiva una igualdá real”. “Queremos consiguir una igualdá de drechos de la ciudadanía independientemente de la llingua que falen y pa ello la única ferramienta ye la oficialidá”, apuntó’l so presidente Iván Llera.

Semeya obra de K3T0 baxo llicencia CC BY 3.0.

Contador Estadistiques