El Constitucional almite a trámite'l recursu de VOX contra l'usu del asturianu na Xunta Xeneral

|
Tribunal Constitucional

La sentencia va tener como ponente al maxistráu Cándido Conde-Pumpido.

El Plenu del Tribunal Consitucional trató'l martes pasá'l recursu de inconstitucionalidá promovíu por diputaos de VOX nel Congresu sobre la reforma del Reglamentu de la Xunta Xeneral, aprobada pol Plenu del Parllamentu asturianu'l 1 de xunetu, almitiéndolu a trámite. Güei comunicólu l'órganu en nota de prensa, onde s'indica que se treslladó tola documentación presentada al Congresu, al Senáu, al Gobiernu estatal, a la Xunta Xeneral y al Conseyu de Gobiernu pa que puedan personase nel procesu y formular les alegaciones que crean convenientes nun plazu de 15 díes.

Los recurrentes impugnen l'únicu artículu de la reforma, "qu'incorpora la posibilidá de que tanto los diputaos como los miembros del Conseyu de Gobiernu, los cargos y empleagaos públicos y los que comparezan nel órganu autonómico puedan utilizar el bable/asturianu". En concreto, derogóse l'artículu 11 y incorpóse un “artículu nuevu 3 bis”, nel Títulu Preliminar del Reglamentu, con dos puntos qu'espresen, el primeru, “nel marcu de lo afitao pol Estatutu d’Autonomía y, nel so casu, pola llexislación que lu desendolque, tanto los Diputaos nel exerciciu de les sos funciones parllamentaries como los miembros del Conseyu de Gobiernu, los cargos y emplegaos públicos y cualesquier persona que compareza énte la Cámara podrán utilizar el bable/asturianu”, y el siguiente, que “la Mesa de la Cámara, oyida la Xunta de Voceros, adoptará, nel so casu, los criterios oportunos a tal efeutu”.

La votación de la modificación, que requería de mayoría absoluta (23 sofitos), salió alantre con 27 votos a favor (Asturies pela Izquierda, FSA, Podemos y el diputáu de Foro Adrián Pumares), 13 en contra (PP, VOX y Pedro Leal, espulsáu de Foro) y 5 astenciones (Ciudadanos).

Artículu 3 y 81.1

VOX considera que'l Reglamentu que permite l'usu del asturianu na Cámara non sólo a los diputaos, como asocedía hasta esti cambu, contradiz la reserva d'Estatutu d'Autonomía afitada nos artículos 3 y 81.1 de la Constitución, asin como'l propiu Estatutu d'Autonomía d'Asturies "que decidió non otorgar la condición de cooficial a la modalidá llingüística del bable/asturianu", diz la nota de prensa. Conde-Pumpido ye'l maxistráu encargáu de dictar la sentencia sobre esti recursu d'inconstitucionalidá.

Contador Estadistiques