Barbón saca alantre los cuartos presupuestos al superar na Xunta les enmiendes a la totalidá

Contó col apoyu d'Asturies pela Izquierda (IX-IAS), Podemos y el diputáu Luis Armando Fernández Bartolomé, ex de Ciudadanos.

La Xunta Xeneral refugó les enmiendes a la totalidá presentaes al Proyeutu de Presupuestos Xenerales d'Asturies pal 2023 del Gobiernu d'Adrián Barbón, con 27 votos por 18, polo que les cuentes siguen la so tramitación. El día 30 va celebrase la sesión na que se van aldericar y votar les enmiendes parciales de los grupos parllamentarios.

Podemos, que sofitó esta mañana los Presupuestos, yá anunció que va presentar delles col oxetivu d'ameyorar les cuentes y ta pendiente del apoyu definitivu a les mesmes de la decisión de la so militancia n'asamblea. IX y Fernández Bartolomé, que yá confirmaron que diben facilitar l'aprobación, lo qu'asegura'l mínimu de 23 diputaos, tamién sumaron los sos votos a los de la Federación Socialista Asturiana (FSA-PSOE) pa valtar les enmiendes a la totalidá de PP, Ciudadanos, Foro y VOX.

Na semeya, un momentu de la intervención d'Ana Cárcaba, conseyera de Facienda, pa presentar el Proyeutu de Llei de Presupuestos.