El Premiu Florina Alías va reconocer la meyor traducción al asturianu del añu anterior

La Conseyería de Cultura, Política Llingüística y Turismu sacó a información pública les bases reguladores de los dos premios lliterarios nuevos, el Florina Alías y l’Enriqueta González Rubín. El primeru va reconocer la meyor traducción del añu anteriores, mentes que’l segundu va destinase a autores menores de 31 años.

Convocaos yá los cinco Premios Lliterarios habituales, esto ye, el XLII Premiu Xosefa Xovellanos de novela, el XXVII Premiu Xuan María Acebal de poesía, el XXVII Premiu Máximo Fuertes Acevedo d'ensayu, el XIV Premiu María Xosefa Canellada de lliteratura infantil y xuvenil, y el XIII Premiu Alfonso Iglesias de cómic, pal segundu semestre espérase la de los dos de creación nueva anunciaos pola conseyería, con una recompensa de 3.000 euros caún. Son el I Premiu Florina Alías a la meyor traducción al asturianu y el I Premiu Enriqueta González Rubín de narrativa moza, de los que se sacaron ayeri les bases reguladores a información pública, con plazu hasta’l 11 d’agostu pa facer aportaciones.

El Florina Alías créase pa “distinguir la meyor traducción al asturianu d’una obra escrita en llingua diferente de la castellana o del gallego-asturiano, de calter lliterariu o non lliterariu que, según la determinación del xuráu, se faiga merecedora del premiu ente les espublizaes nel periodo que determine cada convocatoria”. Nesi sen, afita nel puntu 2 que se van poder presentar aquelles “editaes (bien en formatu papel o en formatu dixital) y difundíes nel añu anterior al de la convocatoria”.

Mentes, l’otru gallardón, el Florina Alías, va ser finalmente pa menores de 31 años y non de 30. “Podrán concurrir a esti premiu persones físiques que tengan menos de 31 años nel momentu que s’afite na convocatoria”, apunten les bases d’un gallardón que naz pa “facilitar la participación de moces y mozos narradores, fomentar la creación lliteraria ente la mocedá y ampliar el corpus d’obres narratives escrites n’asturianu”.