Les bases de la FSA y de los partíos que conformen Convocatoria por Asturies aprueben el prealcuerdu de gobiernu

Adrián Barbón va comunicar el sábadu les diez persones que van conformar el so Executivu, del que namás se conoz el nome d'Ovidio Zapico.

Con una amplia mayoría los cuatro partíos que consultaron a les sos bases estos díes la so posición sobre'l prealcuerdu de gobiernu ente la Federación Socialista Asturiana (FSA-PSOE) y la coalición Convocatoria por Asturies dieron el preste al mesmu. D'esta forma confirmáse'l Gobiernu "d’unidá progresista" p'Asturies nesta llexislatura, como rescamplaba'l documentu firmáu.

Nel casu del partíu que ganó les eleiciones, un 94,7 por cientu del 32 por cientu de la militancia que votó, 2.152 de 2.272 persones, respondió sí a la entruga "¿Sofites l'alcuerdu algamáu ente'l PSOE y Convocatoria por Asturies pa formar un Gobiernu d'unidá progresista que garantice la estabilidá política d'Asturies?". Mentes, Izquierda Xunida (IX) plantegó la cuestión "Col alcuerdu programáticu axuntu: ¿tas d'alcuerdu con que se conforme un gobiernu de coalición progresista n'Asturias ente la FSA-PSOE y 'Convocatoria por Asturies. IU-Más País-IAS'?, que tuvo un 93,5 de 'sí', un total de 733.

Nel casu de Más País, l'apoyu foi del 87,5 por cientu. Izquierda Asturiana (IAS) nun ufrió datos, pero tamién dio'l preste al prealcuerdu de gobiernu "pa que’l proyectu y la visión asturianista de país tea presente na apuesta reformista estos 4 años".

Na semeya, votación na sede d'IX.