El PP quedó solu na Xunta votando contra la creación de la especialidá d'asturianu, que llevaba nel so programa de 2012

Si hai una cuestión alredor del asturianu nel qu’esiste consensu xeneralizáu ente les fuercies polítiques ye la creación de la especialidá docente d'asturianu, cola esceición única del PP, belixerante con cualquier asuntu que tenga que ver cola llingua del país. Nun yera asina nel 2012, cuando llevaba'l so reconocimientu nel so programa eleutoral.

Nel apartáu ‘Enseñanza del asturiano’ el Partido Popular (PP) incluyía dos puntos. El primeru apuntaba que “generalizaremos la oferta del asturiano en los centros educativos”, mientres que’l segundu afitaba que “reconoceremos la especialidad del asturiano para el profesorado”, compromisu que yá incumplía na votación d’una proposición non de llei presentada por Izquierda Xunida (IX) al respeuto nel 2014 que salió alantre colos votos de la FSA, Foro y UPyD.

La formación liderara por Mercedes Fernández votó en contra d’esta mesma cuestión el vienres. Nesta ocasión foi una propuesta de resolución, tamién d’IX, qu’esixía al Executivu estatal “la puesta en marcha inmediata de les xestiones necesaries pal reconocimientu de la especialidá docente de Llingua Asturiana, de mou que se pueda estabilizar la situación del profesoráu correspondiente nos centros educativos asturianos pal cursu 2019-20”.

Cuatro años depués el PP queda otra vuelta solu frayando’l consensu parllamentaria alredor d'esti asuntu, yá que FSA, Podemos, Foro y Ciudadanos votaron a favor de la proposición que namás pretende estabilizar les plantíes profesionales y encaxa na lletra y l'espíritu de la Llei d'Usu. Un cambiu radical qu'amuesa la evolución del PP con respeuto al 2012, cuando inclusive lo incorporaba nel so programa pa les eleiciones y qu'agora fai de la llucha contra l'asturianu una de les exes.

Nesi sen, hai unos díes, el PP tamién quedaba solu en Xixón, negándose a sofitar la tresmisión del asturianu y el Día de la Reciella, que sí cuntó col sofitu de Ciudadanos, Xixón Sí Puede, Foro, PSOE ya IU, tolos demás grupos. Foi nel plenu nel que los conceyales del PP tamién se negaron a reconocer a les víctimes del campu d'esterminiu de Mauthausen.