La Xunta Xeneral torna a refugar “rechazar la cooficialidad del bable”

Per segundu añu siguíu, la propuesta de resolución del PP pa “rechazar la cooficialidad del bable” valtóse colos votos de Podemos, Izquierda Xunida (IX) y Foro, cola astención de la FSA. La Xunta Xeneral tamién aprobó demandar al Gobiernu estatal la creación de la especialidá docente cola oposición única de los populares.

Once meses depués repitióse la mesma votación a la mesma propuesta del PP presentada nel Alderique d’Orientación Política Xeneral. El partíu presidíu por Mercedes Fernández namái contó col sofitu de Ciudadanos “pa rechazar la cooficialidad del bable”, polo que la Cámara refugó la mesma por 17 votos a 14, cola astención de los 14 diputaos socialistes.

Mentes, la d’IX qu’esixía al Executivu estatal “la puesta en marcha inmediata de les xestiones necesaries pal reconocimientu de la especialidá docente de Llingua Asturiana, de mou que se pueda estabilizar la situación del profesoráu correspondiente nos centros educativos asturianos pal cursu 2019-20” salió alantre colos apoyos de la FSA, Podemos, Foro y Ciudadanos, pa sumar un total de 34 votos. Los 11 diputaos del PP posicionáronse en contra.

Na imaxe, momentu d'una de les 182 votaciones celebraes el vienres na tercer sesión del Alderique d'Orientación Política Xeneral. Semeya obra de José Vallina.