El PP queda solu votando en Xixón contra l'asturianu

Güei aprobóse nel Conceyu de Xixón una declaración institucional d'apoyu al Día de la Reciella y a la tresmisión del asturianu-  Tolos grupos votaron sí, sacante'l PP - Nel testu de la mesma nun había nenguna referencia a la cooficialidá nin a nenguna midida llegal.

Como se prevía, el Plenu del Conceyu de Xixón aprobó esta tarde la Declaración Institucional d'apoyu al Día de la Reciella y a la tresmisión interxeneracional del asturianu colos votos de Xixón sí Puede, Izquierda Xunida, PSOE, FORO y Ciudadanos.

El PP yá dixera la selmana pasada que nun diba sofitar la propuesta por ser "un apoyu encubiertu a la cooficialidá".

El testu de la declaración depués de facer un repasu pola historia del asturianu en rellación cola ciudá y el conceyu de Xixón, y partiendo de la frase de Xovellanos na que l'ilustráu escribía que l'asturianu yera la lligua viva del nuestru pueblu que se tresmitía de xeneración en xeneración, nun propón nenguna midida llegal concreta como pue ser la cooficialidá, contra la que'l PP ta faciendo campaña y limítase a tres propuestes:

1. Sofitar la celebración del Día de la Reciella, qu’esti añu algamó la so sesta edición,  llamando a la so continuidá y a la participación nesti eventu de les families de Xixón nos años venideros.

2. Anovar el compromisu históricu de la ciudá y de la corporación cola tresmisión interxeneracional del asturianu, faciendo un llamamientu a la población a faer efectivu, de forma arguyosa y activa, l'usu y la tresmisión d'una llingua histórica que nosidentifica como comunidá, que foi parte del nuesu patrimoniu mientres sieglos, y que se complementa de forma non escluyente col usu del castellanu y d'otros idiomes falaos poles persones que nos visiten o que moren nel nuesu conceyu.

3. Favorecer, potenciar y ampliar les midíes que dende l'ámbitu institucional sían pertinentes pa que les families xixoneses que lo deseyen puedan conocer les ventayes de la tresmisión del asturianu y que tengan facilidaes pa que los sos fíos y fíes tengan opciones para socializase al traviés de la llingua asturiana.