El PP gana les eleiciones estatales del 23-X n’Asturies por 7.000 votos

7 años depués el Partido Popular (PP) torna a ganar unes eleiciones estatales n’Asturies. La candidatura al Congresu liderada por María Esther Llamazares superó en 7.301 votos a la socialista d’Adriana Lastra y los populares algamen 3 representantes, polos 2 del PSOE y l’escañu que lleven Sumar y VOX, mentes que nel Senáu repártense 3 y 1 ente les dos fuercies que rexistraron más apoyos esti 23-X.

Col 100 por cien escrutáu y, a falta del recuentu del votu emigrante, que se va facer el vienres, el PP repitió la victoria del 2016 en coalición con Foro y con Susana López Ares como cabezalera con un 35,28 por cientu de los votos. Sumó nesta ocasión un total de 208.347 polos 207.726 del PSOE, 7.301 que-y dan un tercer escañu por Asturies.

Los populares rexistraron un 36,55 por cientu del total de votos, 12 puntos más qu’en payares del 2019, cuando algamaron un 23,21 por cientu, pero’l bloque d’izquierda tuvo más apoyu. El PSOE, que tamién medró, recibió un 34,37 por cientu (33,26 nes anteriores) y Sumar un 14,87 (Xuníes Podemos tuvo un 15,95 por cientu), mentes que VOX baxó d’un 15,86 por cientu a un 12,48.

Queda como primer fuercia estraparllamentaria’l Partido Animalista con el Medio Ambiente (PACMA) con un 0,50 por cientu, un porcentaxe menor que na última cita coles urnes, cuando recibió un 0,78 por cientu d’apoyos. Asturias Existe-España Vaciada, que debutaba, tuvo 2.248 votos, un 0,38 por cientu.

La participación n’Asturies esti 23-X medró en 13 puntos, al pasar d’un 58,11 por cientu a 71,13 por cientu. Un 1,01 por cientu de los votos foron en blancu (0,24 menos que nel 2019), mesmu porcetaxe que votos nulos (0,04 por cientu más).

Menor distancia nel Senáu

El senador más votáu foi’l popular Pablo González Menéndez, con 209.371 sofitos, mentes que la socialista María Fernández Álvarez algamó’l segundu meyor resultáu, con 208.657. Teresa Mallada, con 206.858, y José Manuel Fernández Díaz ‘Chami’, con 202.490, del PP, superaron a Fernando Lastra, con 201.089, y van ser los otros dos representantes del país na Cámara Alta xunto colos dos que noma la Xunta Xeneral.

Na imaxe, celebración popular, con Llamazares ente'l secretariu xeneral Álvaro Queipo y l'agora senador González. Semeya del PP d'Asturies.