“Lo que pase nun depende de la voluntá de Feijóo nin de la de Sánchez”, apunta Sánchez Vicente

“Naide nun sabe lo que va pasar, y lo que pase nun depende de la voluntá de Feijóo nin de la de Sánchez”, señaló Xuan Xosé Sánchez Vicente a la hora de facer una valoración p’Asturies.com del resultáu eleutoral nes estatales del 23-X. Sobre’l país opina que “nun tien significáu p’Asturies qu’equí gane’l PP o’l PSOE”.

“Lo evidente ye que se movió muncha xente. Nun sabemos si foi votu d’izquierdes o de dereches porque nun hai entovía encuestes”, arrancó l’escritor y ex parllamentariu de la Xunta Xeneral, qu’asiente cuando se-y entruga si foron una sorpresa los datos del escrutiniu. “Tol mundu daba al PP de 140 diputaos p’arriba y ta claro que nun salió lo que se pronosticaba pola razón que sía”, añade.

¿Foi un bon movimientu de Sánchez l’adelantu eleutoral? “Salió-y bien, yá que la perspeutiva yera mui mala depués de les eleiciones autonómiques y municipales”, respuende. Sicasí, Sánchez Vicente señala que la posibilidá d’escosar los 6 meses de presidencia de la Xunión Europea (XE) pudiera ser más positivo a la llarga pal socialista.

Sobre les posibilidaes de formar Gobiernu considera que “Feijóo lo tien difícil. Sánchez dalgo más fácil, anque la so posibilidá pasa por llegar a alcuerdos y poles demandes de los partíos catalanes y vascos”. “Naide nun sabe lo que va pasar, y lo que pase nun depende de la voluntá de Feijóo nin de la Sánchez. Depende de la voluntá d’otros”, añade más alantre citando específicamente a Junts y la so postura, ensin descartar la posibilidá d’una convocatoria nueva d’eleiciones.

Falta d’autoestima

“Como siempre, que gane’l PP o’l PSOE equí nun tien significáu p’Asturies”, asegura cuando salen los resultaos asturianos na conversación. “Equí nun hai nengún partíu propiu o cosa paecía, lo que diz muncho de lo poco que nos tenemos en cuenta los asturianos, de la poca autoestima que tenemos”, llamenta Sánchez Vicente.