Baxa’l paru en 100 persones nun mes de febreru con récor de contratos indefiníos, cuasi 4.000

|
Paru trabayadores

Asturies rexistró esti febreru la cantidá de demandantes d’emplegu más baxa nesti mes dende l’añu 2008. Nel pasáu’l paru baxó en 100 persones pa poner el total en 66.189, lo que supón un descensu del 0,15 por cientu, del 22,84 por cientu si lo comparamos col mesmu mes del 2021, la mayor baxada recoyida en tola serie histórica.

Depués del ascensu de xineru, en concreto en 1.491 desemplegaos pol final de la campaña navidiega, un 2,30 por cientu, el paru tornó a baxar en febreru. Ye una cayida pequeña nun mes nel que rescampla’l récor de creación d’emplegu indefiníu n’Asturies, un total de 3.947 puestos de trabayu que supón un 14,11 por cientu más qu’en xineru y un 134,94 por cientu más que nel mesu periodu del 2021 –suel tar al rodiu del 10 por cientu–-, aumentu que dende la Conseyería d’Industria, Emplegu y Promoción Económica venceyen a la reforma llaboral última.

Por sectores descendió na industria, la construcción y los servicios. Por contra xubieron nel colecuivu ensin emplegu anterior y nel sector primariu.

Nel Estáu’l paru menguó en 11.394 persones pa poner el total en 3.111.684, un 0,36 por cientu. Presenten los meyores datos la Comunidad de Madrid (4,43 por cientu), Illes Balears (3,35) y Melilla (1,33) y los peores Navarra (2,67), Ceuta (2,35) y Murcia (1,29).

La baxada n’Asturies foi entá mayor a niver interañal, l’úndecimu mes siguío de descensu, hasta algamar el récor de la serie histórica, un 22,84 por cientu. “Esta evolución ye especialmente relevante si tenemos en cuenta qu’en febreru del añu pasáu se marcara nel Principau’l nivel de desemplegu más altu de tola pandemia: 85.781 paraos frente a los 66.189 actuales”, rescamplen.

La media estatal quedó nun descensu del 22,38 por cientu, 897.105 desemplegaos menos. N’Illes Balears la baxada foi del 37,92 por cientu, n’Aragón del 29,94 y en Canarias del 27,64 por cientu, mentes que n’Euskadi namái descendió un 10,24 por cientu y en Melilla, un 13,51.

Más cotizantes qu’enantes de la crisis.

Asturias rexistró en febreru 367.628 persones afiliaes a la Seguridá Social, lo que supón un aumentu del 0,28 por cientu respeuto a xineru y la creación de 1.035 puestos de trabayu. En términos interñales, el país recuperó nel añu últimu 11.276 cotizantes.

Son 4.603 afiliados a la Seguridá Social más qu’en febreu del 2020, polo qu’hai más cotizantes qu’enantes del estallíu de la crisis sanitaria. Asina, en febreru la Seguridá Social tenía rexistraess a 2.359 persones en situación de regulación d’emplegu, de los que 1.689 yeren espedientes COVI-19, la cantidái más baxa dende l’entamu de la pandemia.

Contador Estadistiques