El paru xube n'Asturies per tercer mes y torna a baxar nel Estáu

|
Industria paru

Payares finó con 647 paraos más n’Asturies, que se convirtió, xunto con Illes Balears y Melilla, nún de los trés únicos territorios onde medró’l desemplegu. Sicasí, los 66.403 demandantes de trabayu conformen la cantidá más baxa de la serie pa esti mes dende’l 2008.

Aumenta en tolos tramos de edá y en tolos sectores, anque na industria ye práuticamente inesistente al rexistrar una xuba de 11 paraos (0,22 por cientu). El más afeutáu ye servicios, qu’axunta a 7 de cada 10 paraos nuevos.

A nivel estatal sigue la baxada del desemplegu, acumulando 9 meses siguíos de descensu per primer vegada dende qu’hai datos. En payares foi de 74.381 persones pa poner el total en 3.182.687, una media del 2,28 por cientu, la mayor baxada nesti mes, cola Comunitat Valenciana presentando los meyores datos con un 7,29 por cientu.

Nel llau contrariu, Illes Balears, con una medra del 11,11 por cientu, siguíu de Melilla (7,10 por cientu) y Asturies (0,98) por cientu. La comparativa asturiana interañal, por contra, dexa un descensu del paru de 15.111 persones (18,54 por cientu), una cayida superior a la media estatal, que s’asitia nel 17,36 por cientu.

Crez l’emplegu

Asturies caltién la creación d’emplegu llueu de rexistrar en payares un aumentu de la ocupación en 519 persones (0,14 por cientu), hasta sumar un total de 368.636 afiliaos a la Seguridá Social. En rellación col añu últimu, aumenta en 8.054 persones (2,23 por cientu).

Esti ameyoramientu acompañáse del mantenimientu d’altos niveles de contratación, al rexistrase 31.077 contratos (una baxada del 0,30 por cientu con ochobre), lo que supón una media diaria de 1.035 nos 30 díes últimos. Respeuto a payares del 2020, la contratación medra’l 68,11 por cientu, lo que convierte a Asturies na segunda autonomía con meyor evolución depués de Canarias.

Na semeya, un trabayor de la industria, sector que meyor salú amuesa nel país.

AdxuntuTamañu
PDF icon Datos del paru payares 20211.08 MB
Contador Estadistiques