El II Reguerada Fest, que finalmente va celebrase del 13 al 15 d’ochobre, programa 30 actividaes n’asturianu en Candás

Un puntu d’alcuentru y promoción de la cultura y el mundu empresarial qu’usa la llingua asturiana como seña d’identidá. Ye lo que pretende ser el Reguerada Fest, eventu anunciáu nun primer momentu pa esta fin de selmana pero finalmente retrasáu a la del 15 d’ochobre, que va contar en Candás con 30 actividaes y una feria con 20 firmes participantes.

La Feria d’Empreses, Lliteratura, Música, Artes Visuales y Escéniques y Gastronomía Reguerada Fest encara la so segunda edición depués de la bona esperiencia del añu pasáu. El certame coordináu por Xaime Martínez, qu’homenaxa col so nome a Antón de Marirreguerra, primer autor de les nueses lletres con obra conocida, el poema ‘Pleitu entre Oviedo y Mérida: Sobre la posesión de las cenizas de Santa Eulalia’, natural de Llorgozana, nació cola vocación d’averar a la sociedá les actividaes que desenvuelven creadores, entamadores y organizaciones sociales al rodiu de la llingua asturiana.

Nesta ocasión va contar con unes 30 actividaes, amás de la feria de llibros y d’empreses qu’usen l’asturianu con apertura a les 17.30 hores el vienres 13 y a les 11.30 hores el sábadu y el domingu, y la Fábrica d’Ortiz como sede. En concreto van tar presentes Acuto Xuegos, Al Otru Andar, Cartonajes Vir, Cerveza Cotoya, Cuatro Gotes Producciones, Delallama, Díes Adulces, Ediciones Trabe, Editorial Hoja de Lata, La Fabriquina, La Pila de Diseños, Mondo Manzana, Músicasturiana, Nenyuri Ediciones, Nordés Móvil, Panduru, Ordum + La Fartukona, Pintar-Pintar Editorial, Puru Remangu, Ringo Rango y Ser Asturianu.

La inauguración de la esposición ‘Fila/pallabra’, una muestra artística de la uvieína Dido Carrero que va acoyer el Muséu Antón, va ser la primera cita del Reguerada Fest a les 17 hores xunto cola de les obres del taller infantil d’escritura de caligrames nel que participaron escolines y escolinos de Carreño que se va poder visitar na Fábrica d’Ortiz. Recitales lliterarios, talleres, charres, proyeiciones, teatru, conciertos o rutes culturales y lliteraries guiaes complenten un programa que tamién va llegar a otros puntos de Candás como’l Teatru Prendes, el Muséu Antón y la Biblioteca.

La parte musical del Reguerada Fest va correr a cargu de la Banda de Gaites de Candás, el Grupu de Baille Tradicional San Félix, Algaire, Alicia Álvarez y el so ‘Kíkiriki’ pal públicu infantil, y Nacho Vegas, que va tocar los sos ‘Cantares dende’l pie’. Toles actividaes del Reguerada Fest son de baldre.

Na semeya, David González Rodríguez, conceyal de Facienda, Cultura, Educación y Participación Ciudadana, y Antón García, direutor xeneral d'Aición Cultural y Normalización Llingüísticu, que presentaron esta mañana na Casa Conceyu de Carreño'l II Reguerada Fest.