El II Reguerada Fest de Candás va adelantase al mes d’ochobre

|
Alain Fernández, Amelia Fernández López y Antón García trabayu II Reguerada Fest

El Conceyu de Carreño y la Direición Xeneral de Política Llingüística celebraron un alcuentru de trabayu pa poner les bases al II Reguerada Fest de Candás, un espaciu d’alcuentru de la cultura asturiana qu’inclúi una feria d’empreses. La edición del 2023 va adelantase al mes d’ochobre y va tar coordinada otra vuelta por Xaime Martínez.

El Gobiernu, que tuvo representáu por Antón García, ye l’organizador d’esti eventu que na so estrena entamó una docena d’actividaes per cuatro díes, cola Fábrica d’Ortiz como puntu central. El Teatru Prendes, el Muséu Antón y la Biblioteca Pública Municipal Carlos González Posada acoyeron dalguna d’elles y pa esti añu van tar tamién a disposición de la organización, según alcordó ayeri’l direutor xeneral cola alcaldesa Amelia Fernández López y Alain Fernández, direutor del Prendes.

Talleres, actividaes infantiles, club de llectura, esposiciones d'arte, meses redondes, rutes guiaes, artes escéniques, gastronomía, música, lliteratura o cine van entamase en Candás nesta celebración prevista pa los díes 6, 7 y 8 d’ochobre. Amás va entamase un mercáu y feria de llibros y empreses na que pueden participar toes aquelles qu’usen la llingua asturiana.

Lo interesaos en tar presentes tienen de plazu hasta’l 30 de xunu pa solicitar un espaciu. Pa ello han de comunicase con Política Llingüística na direición de corréu electrónicu dxpoliticallinguistica@asturias.org indicando’l nome comercial, la persona de contautu, el sector (tipu de productu) y un teléfonu.

Na semeya, Alain Fernández, Amelia Fernández López y Antón García.

Contador Estadistiques