Candás conviértese en capital de la cultura y la empresa n’asturianu col II Reguerada Fest

Trés díes de recitales lliterarios, talleres, charres, proyeiciones, teatru, conciertos o rutes guiaes, amás d’una feria d’empreses qu’usen l’asturianu, conformen el II Reguerada Fest. Dende’l vienres al domingu Candás va ser el puntu d’alcuentru de la cultura en llingua asturiana.

En total son más de 30 les actividaes que se programen esta fin de selmana, cola Fábrica d’Ortiz como epicentru y el Teatru Prendes, el Muséu Antón y la Biblioteca como otros espacios satélites. Una iniciativa mui ambiciosa entamada pola Viceconseyería de Cultura, Política Llingüística y Deporte en collaboración col Conceyu de Carreño, que coordina Xaime Martínez.

El públicu que s’avere a la capital de Carreño estos díes va poder disfrutar de la esposición ‘Filu/pallabra’, de la uvieína Dido Carrero, nel Muséu Antón que va inaugurar a les 17 hores el II Reguerada Fest cola presencia de la viceconseyera Ana Vanessa Gutiérrez y d’Antón García, direutor xeneral d’Aición Cultural y Normalización Llingüística, y que va poder visitase hasta’l día 22. Al empar va arrancar l’actividá na Fábrica d’Ortiz con una muestra d’obres del taller infantil d’escritura de caligrames nel que participaron escolines y escolinos de Carreño, y l'apertura de la feria de llibros y empreses.

El sábadu y el domingu ésta va tar activa dende les 11.30 hores y va contar cola presencia d’Acuto Xuegos, Al Otru Andar, Cartonajes Vir, Cerveza Cotoya, Cuatro Gotes Producciones, Delallama, Díes Adulces, Ediciones Trabe, Editorial Hoja de Lata, La Fabriquina, La Pila de Diseños, Mondo Manzana, Músicasturiana, Nenyuri Ediciones, Nordés Móvil, Panduru, Ordum + La Fartukona, Pintar-Pintar Editorial, Puru Remangu, Ringo Rango y Ser Asturianu. Una bona representación de firmes qu’empleguen l’idioma nel so día a día y nos sos productos.

El cine, protagonista na primer xornada

El cuentacuentos ‘Contábenmelo en casa’ de Carlos Alba (17.15 hores), la mesa redonda ‘¿Existe’l cine asturiano’ con Pablo Quiroga, Ramón Lluís Bande, Marta F. Crestelo y Pablo Casanueva (18 hores), un recital de poesía entituláu ‘La cuenca bona’ con María F. Abril, Alejandro F. Osorio y Gonzalo G. Barreñada (19 hores) y un conciertu ‘Cantares dende’l pie’ de Nacho Vegas completen esta primer xornada na Fábrica d’Ortiz. Amás, l’escritor candasín David Artime va facer un alcuentru con llectores sobre la so obra ‘Cróniques d’un machista feminazi’ na Biblioteca (18 hores) y va proyeutase nel Teatru Prende la película ‘Bernabé’ de Casanueva (20 hores).

Una amuesa, esta primer xornada, del nivel de les actividaes que llocales y visitantes van poder atopar estos dos díes nun Reguerada Fest que llega pa quedar. Y ye que per delantre esperen actuaciones de la Banda de Gaites de Candás, el Grupu de Baille Tradicional San Félix, Algaire y Alicia Álvarez y el so ‘Kíkiriki’; una mesa redonda sobre’l periodismu y la escritura con Damián Barreiro, Pablo Antón Marín Estrada o Beatriz R. Viado; recitales n’asturianu o gallego-asturiano con María García Díaz, Ismael Ramos, Miguel Rodríguez Monteavaro, Miguel Rojo, Aida Escudero y Ángeles Carbajal; teatru; y delles presentaciones.

Na semeya, un momentu de la primer edición del Reguerada Fest.