‘El gorrumbu’ de Saltantes Teatro gana’l VII Premiu Nel Amaro

Nel so primer accesu a la final del VII Premiu Nel Amaro de Teatru Profesional en Llingua Asturiana o Gallego-asturiano, Saltantes Teatro fíxose col gallardón. Foi con ‘El gorrumbu’, historia que xune la quema recién de Notre-Dame col llibru ‘Notre-Dame de Paris’ de Victor Hugo.

D’esta manera “actualiza una obra clásica, alternando ente la realidá” del socesu del 2019 “y la ficción de los personaxes de Quasimodo y Esmeralda”, rescampla’l xuráu que falló’l premiu. “La escenografía tan llamativa, que convierte l’escenariu nun espaciu multidimensional, y el trabayu actoral, qu’ufierta escenes de muncha emoción y tenrura”, foi otra cuestión que tuvo en cuenta pa decidise por esti trabayu de Saltantes Teatro, que lleva una recompensa de 6.000 euros amás de la programación del espectáculu dientro del ciclu ‘Autores nel Camín’.

Los otros dos finalistes foron Carlos Alba, que presentó ‘Xuan Soldáu’, y Escenapache, qu’acudió con ‘Caperucita en Muniellos’ (sic), que representaron en primer y tercer llugar na fase de festival del premiu, de manera respeutiva. El xuráu d’esta edición del Nel Amaro tuvo compuestu pola crítica teatral Eva Vallines, l’actriz María Cotiello y los escritores Chechu García y Milio Ureta, con Antón García, direutor xeneral d’Aición Cultural y Normalización Llingüística, como presidente, y Laura Marcos, filóloga adscrita al Serviciu de Planificación Llingüística, faciendo’l llabor de secretaria.

‘El gorrombu’ ye una creación de Luis Alija tornada al asturianu por Laura Iglesia y dirixida por Juan Mortera. Carla Loga y Enrique Dueñas interpreten los diferentes personaxes d’una obra pa tolos públicos que tien escenes musicales.

Otros vencedores

Ésta ye la primer vez que Saltantes Teatro, debutante na final del Nel Amaro, lleva esti gallardón. Carlos Alba ganólu en dos ocasiones, nel 2017 con ‘Llázaro de Tormes’ y nel 2022 con ‘Les madreñes vacíes’, al igual qu’Higiénico Papel Teatro, nel 2018 con ‘Hansel y Gretel’ y nel 2020 con ‘El viaxe de Covaletti’, mentes que nel 2019 mereciólu Factoría Norte por ‘Les rellaciones peligroses’ y nel 2021 Nun Tris por ‘La reina la guapura de Leenane’.