Carlos Alba repite trunfu nel Premiu Nel Amaro de teatru 5 años depués

|
'Les madreñes vacíes', de Carlos Alba

Carlos Alba 'Cellero', primer ganador del Premiu Nel Amaro de Teatru Profesional en Llingua Asturiana y Gallego-asturiano, torna a llevar esti gallardón 5 años depués. Si nel 2017 foi con ‘Llázaro de Tormes’, l’adaptación propia del clásicu castellanu, agora failo con ‘Les madreñes vacíes’, fábula basada nun poema de Miguel Hernández.

L’actor y monologuista da vida al so testu faciendo’l papel d’un xuglar qu’entremez títeres, música y pallabra poética. El xuráu del gallardón, que cuenta con un recompensa de 6.000 euros y promoción de la obra por parte del Gobiernu –nel 2017 nun había cuantía económica y el premiu reducíase a una pieza artística y espardimientu del espactáculu–, rescampló “el bon trabayu actoral, la interacción que consigue col públicu, la integración d’oxetos y títeres y l’usu d’una referencia lliteraria universal como Miguel Hernández p’ampliar el repertoriu teatral asturianu”.

‘Les madreñes vacíes’ llegó a la final de la sesta edición del Nel Amaro xunto a les producciones ‘Con M mayúscula’, de Kamante Teatro; ‘Aventurina l’ablana’, de Factoría Norte; y ‘La sierva patrona’, de Producciones Nun Tris, espectáculos que se representaron los vienres del mes pasáu nel Teatru Filarmónica. Coinciden nesta ocasión que toes son obres empobinaes a un públicu infantil y mozu.

Los ganadores anteriores

Hasta’l momentu namái Higiénico Papel Teatro sumaba dos Nel Amaro, les ediciones del 2018 y 2020, gracies a ‘Hansel y Gretel’ y ‘El viaxe de Covaletti’. Nel 2017 yá ganara Alba con ‘Llázaro de Tormes’, mentes que nel 2019 ganó Factoría Norte por ‘Les rellaciones peligroses’ y l’añu pasáu Nun Tris con ‘La reina la guapura de Leenane’.

Contador Estadistiques