El VII Nel Amaro llega a la so fase de festival cola novedá de la incorporación d’obres d’exhibición

Cinco obres conformen la fase de festival del VII Nel Amaro de Teatru Profesional en Llingua Asturiana o Gallego-asturiano, qu’arranca esti vienres cola representación de la obra ganadora nel 2021, ‘La reina la guapura de Leenane’ de Producciones Nun Tris. Ye la primera de les dos d’exhibición que se van poner n’escena esti añu, una fórmula nueva, xunto coles de les trés finalistes que pasaron el corte.

L’uvieín Teatru Filarmónica acueye un añu más les representaciones del festival, que van tener llugar los cinco vienres vinientes a les 18 hores, sacante la primera, que se retrasa a les 20 hores al tar orientada a un públicu adultu. Toles funciones cuenten con entrada llibre hasta completar aforu.

Carlos Alba, dos vegaes ganador del Nel Amaro, va ser el primeru en defender énte públicu y xuráu la so propuesta, ‘Xuan Soldáu’, el 6 d’ochobre. La compañía debutante Saltantes Teatro va facelo’l día 13 con ‘El gorrumbu’, mentes Escenapache, que presenta ‘Caperucita en Muniellos’ (sic), va tar nel Filarmónica’l 20.

Va completase’l festival Nel Amaro’l 27 cola representación de la obra ganador del añu pasáu, ‘Les madreñes vacíes’, tamién d’Alba. Per segundu añu’l Gobiernu habilita una páxina web con tola información sobre les obres participantes esti añu.

Na semeya, representación de 'La reina la guapura de Leenane'.