El Gobiernu moviliza 32 millones y plantega una ayuda d’hasta 400 euros pa los autónomos

|
Conseyu de Gobiernu telemáticu midíes 32 millones

El Conseyu de Gobiernu aprobó un paquete de diez midíes estraordinaries p’amenorgar los efeutos económicos y sociales por cuenta la pandemia de COVID-19, ente les que se plantega una ayuda d’hasta 400 euros accesible pa 12.000 autónomos. En total l’Executivu va movilizar un mínimu de 32 millones d’euros.

Trabayadores y empreses afeutaes por espedientes de regulación temporal d’emplegu, autónomos y microempreses, industries y conceyos van ser los beneficiaos d’esta partida que complementa les iniciatives adoptaes pol Gobiernu estatal el 17 de marzu y da continuidá a les aprobes nes xornaes últimes pol asturianu. Ente éstes últimes taben l’adelantu del pagu del salariu social y de les prestaciones a les personas dependientes, asina como l’aplazamientu de les obligaciones tributaries de les tases y impuestos xestionaos por Asturies.

Ente les diez midíes destaca l’ayuda pa los empresarios autónomos qu’exercen l’actividá a títulu propiu n’aquelles actividaes non autorizaes pa la so apertura mientres el periodu del estáu d’alarma, de la que, según los datos del Gobiernu, podríen beneficiase más de 12.000 autónomos. El sofitu máximu va ser de 400 euros mensuales pal pagu de gastos fixos como alquileres, cuotes hipotecaries y de renting, suministros, etc.

Facilidaes de creitu a conceyos, aplazamientos tributarios y de creitos, una prórroga de trés meses nel pagu d’alquileres pa les compañíes asitiaes nos centros d’empreses dependientes de l’Alministración o un reaxuste de la potencia llétrica contratada son dalgunes de les otres iniciatives aprobaes.

3 positivos menos

Los datos pola pandemia de coronavirus SARS-CoV-2, actualizaos a les 20 hores d’ayeri, dieron 3 positivos menos que’l día anterior pa quedar na cifra total en 900, de los que 819 tán activos. Asina, rexistráronse 59 casos nuevos, polos 62 del miércoles y los 117 del martes.

Sí aumentaron de manera significativa los ingresaos na UCI, pasando de 29 a 48 del martes a ayeri. En planta hai anguaño 192 pacientes y el númberu de curaciones de COVID-19 ye 52.

No que respeuta a los finaos, hai que llamentar dos muertes más p’asitiar la cifra total en 29.

Na imaxe, un momentu del Conseyu de Gobiernu dende'l despachu del presidente Adrián Barbón celebráu de manera telemática. Semeya obra d'Armando Álvarez.

Contador Estadistiques