El Congresu da’l preste a la prórroga del estáu d’alarma hasta’l 12 d’abril

El Gobiernu estatal algamó l’aprobación del Congresu pa prorrogar l’estáu d’alarma previstu hasta’l domingu por cuenta la pandemia de COVID-19, qu’acumula 56.188 positivos y 4.089 finaos, 841 y 27 n’Asturies, de manera respeutiva. Ésti va allargase polo menos dos selmanes más, hasta’l 12 d’abril, pasada la Selmana Santa.

Tolos grupos sofitaron la propuesta del Executivu de coalición del PSOE y Xuníes Podemos –que nun se llibró de les crítiques de la oposición polo que considera fallos de xestión de la crisis del coronavirus–, a esceición d’ERC-Sobiranistes, Junts per Catalunya, EH Bildu, CUP Y BNG. En total, 321 votos a favor y 28 astenciones.

D’esta forma, Pedro Sánchez consigue’l preste del Congresu, necesariu pa sacar alantre la prórroga anunciada’l domingu y aprobada’l martes en Conseyu de Ministros. Asina, les midíes pol estáu d’alarma, como les restricciones de movilidá, qu’obliguen a la ciudadanía a quedar en casa, van allargase polo menos hasta depués de Selmana Santa, en concreto hasta les 00 hores del domingu 12 d’abril.

Los datos d’Asturies

Los datos d’ayeri a les 20 hores daos pola Conseyería de Salú al Ministeriu de Sanidá afiten el total de positivos n’Asturies en 841, lo que supón 62 casos más que na xornada anterior, siendo la incidencia acumulada nos 14 díes últimos de 77,84 por cada 100.000 habitantes. La Rioja algama los 251,20 y la Comunidad de Madrid los 236, mentes que les comunidaes autónomes de la Península menos afeutaes son la Región de Murcia, con 38,14, y Andalucía, con 38,96.

El númberu de finaos nel país, mentes, medró en 2 p’algamar la cifra de 27 –a lo llargo d'esti xueves confirmáronse 2 muertes más–. Na UCI hai ingresaes 34 persones y en planta hai 200, y el númberu de curaos de la COVID-19 ye 40.

Na semeya, el Congresu mientres la sesión d'ayeri, a la qu'asistieron 43 diputaos poles midíes de prevención pol coronavirus, executando la mayoría la opción del votu telemáticu.