El Gobiernu manda parar toda actividá non esencial pol coronavirus y provoca desconciertu pol retrasu na concreción de cuáles son

La ministra de Trabayu, Yolanda Díaz Pérez, tuvo que pidir disculpes esti llunes pola tardanza n’espublizar nel BOE, poco enantes de la medianueche del domingu, el decretu coles actividaes que deberíen cantenese actives tres la decisión nueva del Gobiernu estatal. Toles que nun sían esenciales han d’estar paraes hasta’l 9 d’abril.

Esti retrasu provocó desconciertu nes empreses y nos propios trabayadores, que nun sabíen a última hora d’ayeri si esta mañana deberíen dir a los sos puestos o non, duldes qu'entovía se caltienen güei en delles industries. La situación obligó a Díaz Pérez a disculpase en programes de televisión, nos qu’anunció que mañana habría midíes nueves nel Conseyu de Ministros previstu.

Básicamente, la decisión del Gobiernu estatal anunciada pol presidente Pedro Sánchez el sábadu lleva al paru de la construcción y d’otres sectores que se cataloguen como non esenciales. La mensaxería o la comida a domiciliu son dalgunos de los que nun van parar según l’anexu del decretu “pol que se regula un permiso retribuyíu recuperable pa les persones trabayadores por cuenta ayena que nun presten servicios esenciales, cola fin de reducir la movilidá de la población nes contestu de la llucha contra la COVID-19”.

Tolos trabayadores que queden en casa nun van perder el sueldu, pero van tener que devolver les hores nun periodu que va dende’l momentu nel que fine l’estáu d’alarma actual al 31 d’avientu.

Superaos los 1.000 positivos

Asturies yá superó la barrera del millar de positivos y raspia la del mediu centenar de finaos. Los datos últimos asoleyaos, correspondientes a les 20 hores d’ayeri, asitiaba el total de casos confirmaos en 1.158 tres rexistrar 104’l vienres, 84 el sábadu y 70’l domingu.

El númberu de muertos asitiáse en 49 tres una fin de selmana prieta, con 20 finaos en trés díes. Anguaño na UCI hai 57 persones, mentes que los ingresos en planta disparáronse hasta algamar los 281, con 78 curaciones dende que comenzara la pandemia de coronavirus SARS-CoV-2.

Na imaxe, la ministra Díaz Pérez na rueda de prensa tres el Conseyu de Ministros estraordinariu d'ayeri. Semeya propiedá de Pool Moncloa / J.M. Cuadrado.