Asturies necesita 25.000 mázcares diaries sólo pal consumu del SESPA

|
Pablo Ignacio Fernández Muñiz

La falta de material ye ún los grandes problemes que ta atopando’l personal sanitariu nesta llucha contra la COVID-19. Según confirmó’l conseyeru de Salú, Pablo Ignacio Fernández Muñiz, Asturies consume 25.000 mázcares diaries sólo pal SESPA, lo que significa que les 62.000 qu’unvió Gobiernu estatal son enforma insuficiente.

“Lóxicamente nós tenemos que facer munches más compres, y tamos faciéndoles”, aseguró ayeri mientres una visita al Centru de Referencia pa Persones con Discapacidaes Neurolóxiques (Credine) en Barros, habilitáu p’acoyer pacientes contaxaos col coronavirus SARS-CoV-2. Asina, a pesar de les dificultaes pola falta d’abastecimientu de material de proteición nel mercáu internacional, “tamos teniendo ésitu nes compres, consiguiendo trayer pidíos a veces de 100.000 mázcares, a veces de 150.000”, lo que ta permitiendo de momento “garantizar qu’a los profesionales que tán atentidiendo pacientes COVID positivos nun-yos falte en nengún momento tolos equipos de proteición individual”.

A pesar d’amosar el so agradecimientu al Ministeriu de Sanidá pola coordinación, Fernández Muñiz reconoció que la compra centralizada “nun ye una merca que tea abasteciéndonos tolo que necesitamos”. Nesi puntu confirmó que’l consumu diariu sólo del Serviciu de Salú del Principáu d’Asturies (SESPA) ye de 25.000 mázcares, polo que les 62.000 unviaes dende Madrid namái cubriríen dos díes y mediu de trabayu nos hospitales.

D’igual forma, Asturies sigue ensin recibir les pruebes rápides pa detectar positivos de COVID-19, claves pa controlar la pandemia. Éstes llegarán previsiblemente güei o mañana.

117 positivos y 3 muertes el martes

Les cifres de contaxaos nel país tornaron a xubir de manera importante esti martes. Si’l domingu se rexistraron 49 casos nuevos y el llunes 68, ayeri a les 20 hores esta cantidá xubió hasto los 117, con 3 finaos.

El total de positivos asítiase entós en 779, con 29 persones na UCI y 166 en planta, y 35 curaciones. El númberu de finaos dende l’entamu de la pandemia algama los 25.

Contador Estadistiques