El Concursu de Cuentos pola Oficialidá de Bimenes algama venticinco ediciones

El Conceyu aumenta la dotación de los premios.

El Concursu de Cuentos pola Oficialidá del Asturianu de Bimenes cumple venticinco ediciones y failo con una medra de les recompenses. El vencedor pasa a ganar 700 euros, 100 más que nos años anteriores, mestes que'l segundu lleva 525 euros, lo que supón un aumentu de 75, quedando pal terceru la mesma cantidá, 300 euros.

Los trabayos que se presenten a concursu, ún por persona, han ser inéditos y redautaos en llingua asturiana respetando les normes ortográfiques vixentes. Éstos nun deben esceder les diez fueyes, mecanografiaes a doble espaciu per una cara.

Los participantes han presentar un orixinal del cuentu y una copia en versión informática en CD, too ello baxo un nomatu que debe apaecer nuna plica con tolos datos personales y con un currículu con semeya. Un xuráu formáu por trés persones cualificaes y presidíu pol alcalde, Aitor García Corte, va decidir el ganador del concursu, en xornada entovía por confirmar, al igual que l'actu institucional d'entrega de premios.

El 31 d'agostu ye la fecha tope pal unvío del sobre col cuentu, el CD y la plica a la direición siguiente: Ayuntamientu de Bimenes (pal XXV Concursu de Cuentos pola Oficialidá del Asturianu); Plaza de Miranda de l Douro, s/n; códigu postal 33527 de Martimporra.

Na semeya, pancarta de 'Oficialidá' na Casa Conceyu de Bimenes.