Algama la ventena sesta celebración, con plazu pa presentar los trabayos hasta'l 31 d'agostu.
El Conceyu de Bimenes convoca'l Concursu de Cuentos pola Oficialidá del Asturianu depués d'un añu de parón. Nel 2022 celebró'l so 25 aniversariu, que llevó Miguel Rodríguez Monteavaro con ‘Tucapel’, y n'abril del 2023 tendría llugar l'actu d'entrega de premios nel marcu de la Xira pola Oficialidá, pero nun se convocaría la siguiente edición hasta esti mesmu mes.
Caltiénense les mesmes recompenses, qu'aumentaren na convocatoria anterior, esto ye, 700 euros pal ganador, 525 pal segundu premiu y 300 pal tercer premiu. Tampoco nun hai cambios significativos nes bases, polo que los aspirantes namás van poder presentar un únicu trabayu, inéditos, n'asturianu respetando les normes ortográfiques vixentes.
Les persones participantes han presentar un orixinal del cuentu y una copia en versión informática en CD o llapiz USB, opción esta última que ye la única novedá de les bases, too ello baxo un nomatu qu'ha apaecer nuna plica con tolos datos personales y con un currículu con semeya. Un xuráu formáu por trés persones cualificaes y presidíu pol alcalde, Aitor García Corte, va decidir el ganador del concursu, en xornada entovía por confirmar, al igual que l'actu institucional d'entrega de premios.
El 31 d'agostu ye la fecha tope pal unvío del sobre col cuentu, el CD o USB y la plica a la direición siguiente: Ayuntamientu de Bimenes (pal XXVI Concursu de Cuentos pola Oficialidá del Asturianu); Plaza de Miranda de l Douro, s/n; códigu postal 33527 de Martimporra.
Na semeya, actu d'entrega de premios del XXV Concursu de Cuentos pola Oficialidá del Asturianu, con Carlos Rubiera, de la Fundación Almastur, interviniendo, y los gallardonaos Rodríguez Montevaro, Solinca Turbón (segunda) y Gonzalo G. Barreñada (terceru), sentaos.
Adxuntu | Tamañu |
---|---|
![]() | 614.34 KB |