Un cuentu de Miguel Rodríguez Monteavaro merez la ventena quinta edición del Concursu pola Oficialidá de Bimenes

El Conceyu de Bimenes dio a conocer al ganador del Concursu de Cuentos pola Oficialidá del Asturianu, qu’esti 2022 vivía una edición especial al cumplise los 25 años de la declaración d’oficialidá del 1997. Miguel Rodríguez Monteavaro foi merecedor del gallardón cola obra ‘Tucapel’; completaron el podiu Solinca Turbón y Gonzalo G. Barreñada.

Los escritores Xulio Vixil, José Ángel Gayol y Pablo Rodríguez Medina, ganador del añu pasáu con ‘En brazos de naide’, conformaron el xuráu encargáu de lleer y valorar los cuentos presentaos. D’ente toos decidiéronse pol del escritor de Bual, que lleva una recompensa de 700 euros, 100 euros más que n’ediciones pasaes llueu d’un aumentu de la dotación del concursu.

Tamién medró la cantidá pal segundu, que pasó a 525 euros, 75 más, y va recibir la llangreana Turbón con ‘Teresa’. Pal terceru, mentes, caltuviéronse los 300 euros, que son pal sotrondín González Barreñada pol so cuentu ‘Verde como los sos güeyos’.

Nes selmanes próximes el Conceyu de Bimenes va dar anuncia de la fecha d’entrega de los premios, actu nel que Rodríguez Monteavaro va facer llectura pública del cuentu ganador. El bualés ta acabante de presentar la propuesta lliteraria, musical y audiovisual ‘A luz, Orión e a nova luz’, que preparó na Residencia Literaria 1863 d’A Coruña gracies a la beca 'Asturies'.