El ciclu Uviéu Abierto sobre cultura asturiana abre coles presentaciones de los llibros de los Premios Lliterarios 2020

La Conseyería de Cultura, Política Llingüística y Turismu estrena la iniciativa Uviéu Abierto, centráu na llingua y cultura asturiana, que va tener como sede estes selmanes la Biblioteca Ramón Pérez de Ayala d’Uviéu. Les presentaciones de los llibros de los Premios Lliterarios 2020 van ser les primeres actividaes, abriendo’l ciclu Xune Elipe con ‘Hai una llinia trazada. Historia de la música asturiana’.

El ganador del XXVI Premiu Máximo Fuertes Acevedo d’ensayu con esti testu de calter pegagóxicu y divulgativu que viaxa pela historia de la nuesa música dende los primeros tiempos de la humanidá hasta anguaño va tar acompañáu por Adolfo Camilo Díaz y el direutor xeneral de Política Llingüística, Antón García. Trabe encargóse de la edición d’esta obra, yá a la venta nes llibreríes de país.

La presentación d’Elipe va tener llugar esta tarde a les 18.30 hores, mentes que la de los trabayos del restu de ganadores de los cinco Premios Lliterarios convocaos nel 2020 y un cómic de la del 2019 van entamar a les 19 hores, sacante’l gallardón de lliteratura infantil y xuvenil, que va celebrase’l xueves viniente a les 17.30 hores pa facilitar l’asistencia de públicu al que va empobináu. Inaciu Galán y Vero Suari foron los ganadores del XIII Premiu María Josefa Canellada con ‘La curuxa Catuxa’, que va editar Impronta.

El restu de presentaciones, siempre de xueves, van ser el 17 la de ‘El fervinchu’ (Impronta), de Sidoro Villa, XLI Premiu Xosefa Xovellanos de novela; el 24 la de ‘Tayu’ (Trabe), d’Alejandro Fernández-Osorio, XXVI Premiu Xuan María Acebal de poesía; el 3 de marzu ‘El sol na escombrera’ (Impronta), d’Alberto Vázquez, XII Premiu Alfonso Iglesias de cómic; y el 24 de marzu la de ‘Seltegu’ (Impronta), de Ruma Barbero, XI Premiu Alfonso Iglesias de cómic. Política Llingüística va completar Uviéu Abierto con más actividaes en marzu, toes con entrada llibre.