La presentación de 'El fervinchu' da continuidá a Uviéu Abierto

Sidoro Villa ye l'autor de la novela que llevó'l XLI Premiu Xosefa Xovellanos y edita Impronta.

El tercer de los Premios Lliterarios 2020 que se presenten dientro del ciclu d'actividaes sobre llingua y cultura asturiana Uviéu Abierto, qu'entama la Conseyería de Cultura, Política Llingüística y Turismu, va ser 'El fervinchu'. Esta esperada obra del escritor de Lieres yá ta disponible nes llibreríes del país.

La cita va ser esta tarde a les 19 nel salón d'actos de la Biblioteca d'Asturies Ramón Pérez de Ayala, asitiada n'Uviéu. Va presentar l'actu, al que tien confirmada la so asistencia Antón García, direutor xeneral de Política Llingüística, la filóloga y profesora del IES Juan de Villanueva de La Pola Siera, Liliana Díaz.

En 'El fervinchu' Villa presenta, "con munchu humor negro y fondura psicolóxica, les rellaciones difíciles ente los miembros d'una familia asturiana ente lo rural y lo urbano nos últimos años del sieglu XX, nuna narración coral bien entretenida qu'amiesta tonos cuando esperpénticos, cuando tráxicos", apunten dende Política Llingüística.

Próximes actividaes programaes

Les otres feches pendientes d'Uviéu Abierto hasta'l momentu programaes son la presentación de‘Tayu’ (Trabe), d’Alejandro Fernández-Osorio, XXVI Premiu Xuan María Acebal de poesía, el xueves vinientes; de ‘El sol na escombrera’ (Impronta), d’Alberto Vázquez, XII Premiu Alfonso Iglesias de cómic, el 3 de marzu; y de ‘Seltegu’ (Impronta), de Ruma Barbero, XI Premiu Alfonso Iglesias de cómic, el 24 de marzu. La entrada pa toes estes actividaes ye llibre hasta completar aforu.