El bombu de la Copa namái va tener cuatro equipos asturianos

El Real Titánico viose superáu pol Anaitasuna na segunda parte (0-2). El sortéu de la primer ronda va celebrase'l llunes en Sevilla.

Nun pudo ser. L'equipu llavianés acusó la inactividá –la Tercera asturiana lleva parada dende'l 18 d'ochobre, mentes que la vasca siguió con normalidá– y nun pudo reponese a un penalti inocente de Robles que finalizó Arzalluz nel minutu 62.

La primer metá foi igualada, cola meyor ocasión pa los llocales, exiliaos poles normes federatives nel Nuevu Nalón, tres un fallu del porteru Mikel Ruiz que nun pudo aprovechar Jairo Santos. Tres el descansu los d'Azkoitia dieron un pasu alantres y, dende'l penalti, amosáronse superiores a un Titánicu faltu de ritmu competitivu.

Nel tramu final, Aramendi, qu'entamara'l partíu nel bancu, finalizó una bona xugada vasca pa poner el definitivu 0-2 nel marcador. Un resultáu que va permitir al Anaitasuna recibir un Primera División na primer ronda de Copa.

Los de la Supercopa, exentos

El llunes va celebrase el sortéu, nel que va haber cuatro equipos asturianos. Sporting y Uviéu van tener como rival un Tercera o un Segunda B, mentes que'l Llanera va empareyase con un Primera o un Segunda y el CD Lealtad con un Segunda o un equipu de la so mesma categoría na selmana del 16 d'avientu.

Queden llibres nesta primer ronda –tamién de la segunda– los cuatro equipos clasificaos pa la Supercopa que va tener llugar en xineru per segundu añu n'Arabia Saudita, nesta ocasión en La Meca. Éstos son el campeón de Lliga, Real Madrid; el segundu clasificáu, Barcelona; y los dos finalistes de Copa, Athletic Club y Real Sociedad.

Na semeya, Aramendi prepárase pa llanzar el penalti.