El Real Titánico abre la participación asturiana na Copa 2020-2021

|
Crucies ronda previa Copa 2020-2021

Los de Llaviana xueguen en L'Entregu pa recibir en primer ronda a un equipu de Primera. VINX va emitir el partíu en direuto.

El campeón de preferente, el Real Titánico, xuega esta tarde nel Nuevu Nalón (19 hores) la ronda previa de la Copa col Ainatasuna como rival. La normativa de la Real Federación Española de Fútbol (RFEF) obliga a contar con lluz artificial pa poder exercer como llocal en campu propiu, requisitu que nun cumple 'Las Tolvas', polo que los llavianeses vense obligaos a desplazase al conceyu vecín de Samartín del Rei Aurelio.

La paralización de la competición de Tercera División complica'l partíu pa los de La Pola, que nun xueguen un partíu oficial dende'l 18 d'ochobre, cuando empataron col Condal na so visita a Noreña por 1-1. Por contra, l'equipu d'Azkoitia acumula cuatro choques lligueros nel grupu B de la Tercera vasca, onde ocupa la cuarta plaza con 5 puntos.

Sicasí, el Titánico afronta'l partíu con optimismu y la esperanza de pasar pa recibir a un Primera División na primer ronda de Copa, na que tamién van entrar el CD Lealtad, de Segunda División B, y el Llanera, de Tercera, amás de los dos equipos profesionales del país, el Sporting y l'Uviéu. Los partíos tán programaos pa la selmana del 16 d'avientu, con sortéu previstu'l llunes.

Na imaxe, los crucies que dexó'l sortéu de la fase previa de la Copa.

Contador Estadistiques