El Llanera va recibir al Celta, mentes que Sporting y Uviéu van tener rivales de Tercera

El CD Lealtad va xugar col Alcorcón, últimu clasificáu de Segunda, na primer ronda Copa.

El sortéu celebráu nel estadiu de La Cartuja, en Sevilla, sede de la final d'esta edición, dexó la visita d'un Primera División a Asturies. Ye'l Celta, que se va midir col Llanera na selmana del 16 d'avientu.

Los dos equipos asturianos de Segunda van tener como rivales a conxuntos de Tercera ensin esperiencia en categoríes superiores. L'Uviéu va viaxar a Estremaúra pa xugar contra'l CD Coria, mentes que'l Sporting va facelo a La Mancha pa enfrentase al Quintanar del Rey, que cuenta con prau artificial.

El Lealtad, tres xugar l'añu pasáu col Cádiz, repite con un Segunda División. Si los andaluces yeren los líderes cuando visitaron Villaviciosa'l 17 d'avientu (0-1, gol de Querol), agora van ser los últimos clasificaos, l'Alcorcón.