El 89,1 por cientu de les families d’alumnos del plan pilotu pa facer l’asturianu vehicular ta satisfechu col mesmu

La comunidá educativa de los centros que participaron nel Plan Pilotu esperimental de Promoción del Usu del Asturianu dio una valoración positiva del mesmu, con una satisfaición ente les families del 89,1 por cientu. Les seis escueles repiten esti añu, ampliando a quintu de Primaria les clases col asturianu como llingua vehicular.

Anque’l conseyeru d’Educación y Cultura, Genaro Alonso, anunciara esti añu la so intención d’ampliar el plan “a otra decena de centros”, esti cursu finalmente namái ta en marcha nos colexos orixinales: La Carriona-Miranda (Avilés), El Bosquín (L’Entregu), Xentiquina (Lieres), El Cotayu (Carbayín), Bernardo Gurdiel (Grau) y Santiago Apóstol (Mieres). Néllos los alumnos de cuartu de Primaria y los del añu pasáu, yá en quintu, dan n’asturianu una materia de les árees de Ciencies Sociales, Ciencies Naturales, Educación Artística o Educación Física, en total una hora selmanal, siempre de manera voluntaria, amás de l’asignatura propia de Llingua Asturiana y Lliteratura.

Fernando Padilla, direutor xeneral de Planificación Llingüística y Normalización, presentó esta mañana los datos d’una encuesta fecha nos centros, que reflexa que’l Plan llevóse alantre con tola normalidá nos centros y que se valoró de manera positiva por parte de la comunidá educativa. Ente estos resultaos destacóse qu’un 89,1 por cientu de les families tuvo satisfecha col funcionamientu xeneral del plan, mentes que’l 83,6 por cientu recomendaría a otres la participación nel mesmu.

Ameyoramientu xeneral de los resultaos académicos

Tocante a la valoración poles families sobre si la participación del so fíu nel supunxo-y un esfuerciu estra pa superar la materia, el 68,2 por cientu aseguró que non, y el 82,5 por cientu consideró que’l plan ufiertó-y más oportunidaes de deprendimientu. No que respeuta a los resultaos académicos, el 41,59 por cientu de los estudiantes ameyoró los resultaos algamaos el cursu anterior nesa mesma materia, mentes qu’un 42,57 por cientu caltuvo les calificaciones.

El númberu total d’estudiantes que participaron foi de 105, representando un 3,41 por cientu del total del alumnáu que cursa Llingua Asturiana y Lliteratura en cuartu de Primaria. En cuantes al profesoráu participante, ésti consideró perpositivamente la esperiencia, demandando, eso sí, materiales didáuticos adaptaos al asturianu y rellacionaos col área qu’impartieron nel plan pa facilitar el desenvolvimientu del so llabor docente.