Educación refuga siguir col plan pa facer vehicular l’asturianu porque “xurídicamente nun se pue dir más allá al nun ser llingua cooficial”

|
Lydia Espina

Foro encamentó a la conseyera d’Educación, Lydia Espina, a recuperar y ampliar a institutos el Plan Pilotu esperimental de Promoción del Usu del Asturianu puestu en marcha en seis centros por Genaro Alonso nos cursos 2017-2018 y 2018-2019. Magar los bonos resultaos del mesmu, refúgase da-y continuidá al mesmu porque “xurídicamente nun se pue dir más allá al nun ser l’asturianu llingua cooficial”.

L’informe asoleyáu pola conseyería nel so momentu espuso “numberosos datos positivos”, reflexó’l diputáu Adrián Pumares nuna entruga “sobre si tien previsto recupar el plan” na Comisión d’Educación. “Tolos colexos confirmaron la bona acoyida que tuvo tanto ente l’alumnáu como ente les families” y que “el nivel de normalización del asturianu nos colexos participantes foi altu”, añadió.

Los seis centros participantes foron La Carriona-Miranda (Avilés), El Bosquín (L’Entregu), Xentiquina (Lieres), El Cotayu (Carbayín), Bernardo Gurdiel (Grau) y Santiago Apóstol (Mieres). Y los beneficiaos por esta iniciativa, los escolinos de cuartu de Primaria, que pudieron dar n’asturianu una materia de les árees de Ciencies Sociales, Ciencies Naturales, Educación Artística o Educación Física n’asturianu, en total una hora selmanal, siempre de manera voluntaria, amás de l’asignatura propia de Llingua Asturiana y Lliteratura.

El diputáu de Foro rescampló tamién que “un 42,57 por cientu de los alumnos caltuvieron les calificaciones na materia respeuto al cursu anterior, y un 41,59 por cientu ameyoraron los resultaos. Amás, les evaluaciones que s’efeutaron a les families amosaron resultaos mui positivos: un 89,1 por cientu mostráronse satisfeches col funcionamientu xeneral del plan, un 83,6 por cientu recomendaríaselo a otres families, y un 82,5 por cientu afirmó qu’esti plan ofreció más oportunidaes d’aprendizaxe a los sos fíos”.

Ente les deficiencies que se deteutaron, apuntó que’l profesoráu reclamó a la conseyería “que crease materiales didáuticos adaptaos al asturianu pa les asignatures que participase nel plan y la necesidá de contar con un currículu n’asturianu pa les diferentes materies pa d’esa manera poder facilitar el so trabayu”. “A la vista d’estos bonos datos nun s’entiende mui bien por qué se decidió acabar con esti plan nel añu 2019. Creemos sinceramente que sería interesante recuperar esta iniciativa educativa al ser un bon mecanismu pa siguir afondando na normalización y dignificación del asturianu nel sistema educativu”, afirmó.

Consideró asina que “se debería estender a más colexos, inclusive los institutos, pa que tol alumnáu matriculáu n’asturianu pudiese tener garantizáu esi derechu a ampliar la so formación llingüística d’una manera asolutamente voluntaria”, tamién na zona del Navia-Eo pa los escolinos que reciben clases de gallego-asturiano.

“Tenía un principiu y un final”

Na so respuesta, Espina esplicó que “xurídicamente nun se pue dir más allá al nun l’asturianu llingua cooficial. Ésa ye la clave”. Confirmó que’l plan “tuvo’l sofitu de la comunidá educativa” y que l’análisis de resultaos “tenía unes conclusiones satisfactories”, pero especificó que “yera una actuación de calter esperimental, con limitaciones xurídica y organizatives, que tenía un principiu y un final”.

“La única manera de poder garantizar l’enseñu n’asturianu ye al traviés de la cooficialidá”, insistió, pa llueu defender “la cooficialidá amable, el nuesu Gobiernu siempre faló asina, ensin imposiciones”.

Contador Estadistiques