Alonso espera ampliar el plan pa facer l’asturianu vehicular en Primaria a “otra decena de centros”

Genaro Alonso visitó esti llunes el Colexu Públicu El Bosquín pa inaugurar una placa pa reconocer el caráuter pioneru de la escuela de L’Entregu na puesta en marcha en plan pilotu pa facer l’asturianu vehicular en Primaria. El conseyeru d'Educación y Cultura espera ampliar en “otra docena de centros” la iniciativa pal cursu viniente.

El Bosquín ye xunto con La Carriona-Miranda (Avilés), Xentiquina (Lieres), El Cotayu (Carbayín), Bernardo Gurdiel (Grau) y Santiago Apóstol (Mieres), ún de los seis colexos que punxeron en marcha en setiembre el Plan Pilotu esperimental de Promoción del Usu del Asturianu en cuartu de Primaria. D’esta forma, les escolines y escolinos d’estos centros dan n’asturianu una materia de les árees de Ciencies Sociales, Ciencies Naturales, Educación Artística o Educación Física n’asturianu, en total una hora selmanal dividíes en dos sesiones, siempre de manera voluntaria, amás de l’asignatura propia de Llingua Asturiana y Lliteratura.

Na escuela de L’Entregu, cola totalidá del alumnáu cursando asturianu, “el plan desarróllase non sólo con normalidá, sinón con total aprovechamientu, y sobre manera con satisfaición de los padres, los alumnos y el profesoráu” aseguró Alonso, que señaló que querría que pal cursu viniente “foran otra decena de centros, en función de los que tengan disponiblidá, esi calter voluntariu y profesoráu formáu”, los que se sumaren al plan pilotu. Tamién defendió’l mesmu énte la denuncia del PP énte’l Tribunal Superior de Xusticia d’Asturies (TSXA) al entender que la manera correuta de promocionar l’idioma nel sistema educativa, como marca la Llei d’Usu y Promoción del Bable/Asturianu, “ye usándolu, bien como llingua propia d’estudiu o como llingua d’usu vehicular pa otres materies”.

El restu de centros que participen nel plan tamién van recibir, al igual qu’El Bosquín, una placa conmemorativa como reconimientu en próximes feches.